Pune Gaur rescue – सिंहगड रस्त्यावर विश्रांतीनगर येथील कालवा रस्त्यावर सुटका केलेल्या रानगव्याला बोर व्याघ्र प्रकल्पात सोडण्यात आले आहे. पालिकेच्या दोन मोठ्या जलवाहिन्यांमध्ये हा रानगवा मंगळवारी अडकला होता. या नर रानगव्याची पुणे वन विभागाने विविध शासकीय यंत्रणा, पशुवैद्यकीय तज्ज्ञ, रेस्क्यू चॅरिटेबल ट्रस्ट तसेच स्थानिक नागरिकांच्या मदतीने सुटका केली होती.

सुटकेनंतर रानगव्याची पशुवैद्यकीय तज्ज्ञांनी वैद्यकीय तपासणी केली. त्यात त्याला कोणतीही गंभीर दुखापत झाली नसल्याचे आढळले. निसर्गमुक्त करण्यास तो वैद्यकीयदृष्ट्या सक्षम असल्याचे निष्पन्न झाले. त्यानंतर प्रधान मुख्य वनसंरक्षक (वन्यजीव) यांच्या आदेशान्वये रानगव्याचे विदर्भातील वर्धा जिल्ह्यातील बोर व्याघ्र प्रकल्पामध्ये पुनर्वसन करण्याचा निर्णय घेतला.

या प्रकल्पात रानगव्यांची शाश्वत लोकसंख्या बळकट करणे आणि अधिवासातील पर्यावरणीय समतोल वृद्धिंगत करणे या उद्देशाने गव्याचे पुनर्वसन करण्यात आले. पशुवैद्यकीय तपासणीनंतर रानगव्याला विशेष वाहनाद्वारे बोर व्याघ्र प्रकल्पात नेण्यात आले. यावेळी पशुवैद्यकीय अधिकारी आणि वन विभागाच्या अधिकाऱ्यांनी त्याच्यावर देखरेख ठेवून आवश्यक काळजी घेतली. बोर व्याघ्र प्रकल्पात गव्याला सोडण्याची कार्यवाही बोर व्याघ्र प्रकल्पाचे उपसंचालक मंगेश ठेंगडी यांच्या निरीक्षणाखाली, उपवनसंरक्षक अभिजीत वायकोस यांच्या नियोजनाखाली पार पडली.