Vaibhav Sooryavanshi Vice Captain Controversy East Zone Duleep Trophy Priyank Panchal Questions : आयपीएल २०२६ आणि अलीकडेच पार पडलेल्या झिम्बाब्वे दौऱ्यात आपल्या स्फोटक फलंदाजीने सर्वांचे लक्ष वेधून घेणाऱ्या १५ वर्षीय युवा फलंदाज वैभव सूर्यवंशी (Vaibhav Suryavanshi) पुन्हा एकदा चर्चेत आला आहे. त्याचा दुलीप करंडक (Duleep Trophy) स्पर्धेसाठी पूर्व विभागाच्या (East Zone) संघात समावेश करण्यात आला आहे. एवढेच नाही तर निवड समितीने थेट या संघाच्या उपकर्णधारपदी त्याची नियुक्ती केली आहे. मात्र, अवघ्या १५ व्या वर्षी आणि केवळ आठ प्रथमश्रेणी सामन्यांचा अनुभव असताना त्याच्याकडे उपकर्णधारपद सोपवल्याने निवड समितीच्या या निर्णयावर जोरदार टीका होत आहे.

प्रियांक पांचाळचे थेट सवाल!

गुजरातचा माजी कर्णधार आणि देशांतर्गत क्रिकेटमधील अनुभवी फलंदाज प्रियांक पांचाळने (Priyank Panchal) या निर्णयावर उघडपणे प्रश्नचिन्ह उपस्थित केले आहे. सोशल मीडिया प्लॅटफॉर्म ‘एक्स’वर (X) पोस्ट शेअर करत तो म्हणाला, “माझ्या मते विभागीय निवड समितीने १५ वर्षांच्या वैभव सूर्यवंशीला उपकर्णधार बनवणे टाळायला हवे होते. उपकर्णधारपदाच्या या जबाबदारीमुळे त्याच्यावर अनावश्यक दबाव येऊ शकतो. आधी त्याला लाल चेंडूच्या (Red Ball Cricket) क्रिकेटमधील बारकावे पूर्णपणे समजून घेऊ द्या. त्यानंतरच त्याच्यावर अशी जबाबदारी सोपवणे योग्य ठरले असते.”

I think the zonal selectors could have avoided making Vaibhav Sooryavanshi the East Zone vice captain. It could put unnecessary pressure on the young kid. Let him understand the dynamics of red ball cricket first, properly, before entrusting such duties upon him. Thoughts?… pic.twitter.com/9pg8a8ymSs

— Priyank Panchal (@PKpanchal09) August 6, 2026

ईश्वरनसारखा अनुभवी खेळाडू संघात असताना…

दुलीप करंडक स्पर्धेत पूर्व विभागाच्या संघाचे नेतृत्व ईशान किशनकडे सोपवण्यात आले आहे. विशेष म्हणजे, या संघात ११५ पेक्षा जास्त प्रथमश्रेणी सामने खेळलेला अभिमन्यू ईश्वरनसारखा अत्यंत अनुभवी खेळाडू असतानाही केवळ ८ प्रथमश्रेणी सामने खेळलेल्या १५ वर्षांच्या वैभवला उपकर्णधार बनवण्यात आले. प्रियांक पांचाळच्या या वक्तव्यानंतर सोशल मीडियावर नव्याने वाद सुरू झाला असून, अनेक माजी क्रिकेटपटू आणि चाहत्यांनीही वैभवला आधी प्रथमश्रेणी क्रिकेटमध्ये स्थिरस्थावर होण्यासाठी वेळ दिला पाहिजे, असे मत व्यक्त केले आहे.

हेही वाचा – Hamza Nazar Ban : पीसीबीचा मोठा दणका! ‘या’ स्टार खेळाडूवर २ वर्षांची बंदी अन् १० लाखांचा दंड; अनधिकृत लीग खेळणाऱ्यांवरही टांगती तलवार

दुलीप ट्रॉफीसाठी पूर्व विभागाचा संघ : अभिमन्यू ईश्वरन, सुदीप घारामी, मोहम्मद शमी, मुकेश कुमार, शाहबाज अहमद, सूरज जैस्वाल, इशान किशन (कर्णधार), वैभव सूर्यवंशी (उपकर्णधार), विराट सिंग, कुमार कुशाग्रा, शिखर मोहन, सुब्रांशू सेनापती, अभिजित सरकार आणि अनुकुल रोशिया.

राखीव खेळाडू: आयुष लोहारुका, श्रीदाम पॉल, संबित एस बराल, शरणदीप सिंग आणि स्वस्तिक सामल.