PMC News : जंगली महाराज रस्त्यावरील छत्रपती संभाजी उद्यान परिसरातील मेकॅनिकल पार्किंग अखेर जमीनदोस्त होणार आहे. अनेक वर्षांपासून बंद पडून धोकादायक बनलेल्या या लोखंडी स्ट्रक्चरच्या पाडकामासाठी महापालिकेने स्थायी समितीसमोर प्रस्ताव ठेवला आहे. या कामासाठी स्पार्कटेक इंजिनिअरिंग संस्थेची सर्वात कमी दराची निविदा स्वीकारण्यात आली असून,

लोखंडी स्ट्रक्चर हटविण्यासाठी प्रति मेट्रिक टन २९ हजार रुपये (जीएसटीसह) दर मंजुरीसाठी ठेवला आहे. महापालिकेने उभारलेले हे मेकॅनिकल पार्किंग गेल्या अनेक वर्षांपासून वापराविना पडून आहे. देखभाल, दुरुस्ती आणि संचालनासाठी आवश्यक तांत्रिक कौशल्य असलेला ठेकेदार मिळत नसल्याने त्याची देखभाल झाली नाही. यामुळे संपूर्ण लोखंडी स्ट्रक्चर गंजून धोकादायक होऊन नागरिकांच्या सुरक्षिततेचा प्रश्न निर्माण झाला होता.

पालिकेच्या पाहणीत हे पार्किंग पुन्हा सुरू करण्यासाठी मोठा खर्च येणार असल्याचे स्पष्ट झाले. त्यातून मिळणारे संभाव्य उत्पन्न आणि दुरुस्तीचा खर्च यांचा ताळमेळ बसत नसल्याने हा प्रकल्प आर्थिकदृष्ट्याही व्यवहार्य नसल्याचा निष्कर्ष प्रशासनाने काढला. त्यामुळे संपूर्ण स्ट्रक्चर हटविण्याचा निर्णय घेण्यात आला. या कामाला पालिका आयुक्तांनी २१ मे २०२६ रोजी प्रशासकीय मान्यता दिली आहे.

या कामासाठी १९ मे २०२६ रोजी बी-२ पद्धतीने निविदा मागविल्या होत्या. एकूण सात निविदा प्राप्त झाल्या. त्यापैकी चार निविदा तांत्रिकदृष्ट्या पात्र ठरल्या. स्पार्कटेक इंजिनिअरिंगने जीएसटीसह प्रति मेट्रिक टन २९ हजार रुपये असा सर्वात कमी दर सादर केला. ही निविदा स्वीकारून त्यांच्याशी करार करण्यासाठी स्थायी च्या मंजुरीचा प्रस्ताव तयार केला आहे.

मेट्रोचाही वापरास नकार
छत्रपती संभाजी उद्यानालगतच महामेट्रोचे स्थानक असल्याने हे मेकॅनिकल पार्किंग त्यांना वापरासाठी देण्याबाबत दोन वर्षांपासून चर्चा सुरू होती. मात्र, पार्किंगमधील वाहन उचलण्याची यंत्रणा आणि स्ट्रक्चर हे जुन्या व कमी आकाराच्या चारचाकी वाहनांसाठी तयार केले होते. सध्याच्या मोठ्या आकाराच्या वाहनांसाठी त्यामध्ये पार्किंग करणे शक्य नाही. दुरुस्ती करून वापरात आणल्यास पार्किंगची क्षमताही कमी होणार होती. त्यामुळे हे पार्किंग उपयुक्त नसल्याने ते हटविण्याचा निर्णय घेतला आहे.