Pune Metro – लोहगाव येथील पुणे आंतरराष्ट्रीय विमानतळाला जोडणाऱ्या कल्याणीनगर ते पुणे विमानतळ या नवीन मेट्रो मार्ग करण्यावर केंद्रीय नागरी हवाई वाहतूक राज्यमंत्री मुरलीधर मोहोळ यांनी बैठकीत शिक्कामोर्तब केले. यामुळे पुणे आणि पिंपरी-चिंचवडमधील सर्व मेट्रो मार्ग थेट विमानतळाला जोडले जाणार आहेत.

शिवाजीनगर येथील पुणे मेट्रो वन येथे केंद्रीय राज्यमंत्री मुरलीधर मोहोळ यांच्या उपस्थितीत पुणे मेट्रो आणि पुणे महापालिकेच्या विविध प्रकल्पांबाबत आढावा बैठक पार पडली. या वेळी महामेट्रोचे व्यवस्थापकीय संचालक श्रावण हर्डीकर, महापालिका आयुक्त नवल किशोर राम, महामेट्रोचे संचालक अतुल गाडगीळ, विनोदकुमार अग्रवाल आणि शहर अभियंता अनिरुद्ध पावसकर आदी उपस्थित होते.

पीसीएमसी ते भक्ती शक्ती चौक, रामवाडी ते वाघोली (विठ्ठलवाडी), खराडी- हडपसर- स्वारगेट-खडकवासला, नळ स्टॉप- वारजे- माणिकबाग आणि हडपसर ते लोणी काळभोर या मंजूर न झालेल्या मेट्रो मार्गिकांच्या प्रस्तावांची माहिती घेत, याबाबत केंद्र आणि राज्य सरकारकडे पाठपुरावा करून प्रकल्पांना गती देण्याचे निर्देश मोहोळ यांनी दिले.

मेट्रो स्टेशनवरून प्रवाशांना इच्छित स्थळी जाण्यासाठी लास्ट माइल कनेक्टिव्हिटी अधिक सक्षम करण्यासाठी पीएमपीएमएल प्रशासनासोबत समन्वय साधून नियोजन करण्याचे आदेश दिले. पुण्याच्या वाहतुकीसाठी मेट्रो विस्तार आवश्यक आहे. नागरिकांच्या सूचनेनुसार मार्गांची पुनर्रचना करा, तांत्रिक मंजुरी आणि निधी कमी पडू देणार नाही, असे मोहोळ यांनी स्पष्ट केले.

अहवाल तयार करण्याचे निर्देश
शहराभोवती ३६ किलोमीटर लांबीचा आणि २४ मीटर रुंदीचा एचसीएमटीआर वर्तुळाकार मार्ग उभारण्यावर अंतिम शिक्कामोर्तब झाले. प्रलंबित प्रकल्पाची निविदा प्रक्रिया तातडीने सुरू करण्याचे निर्देश मोहोळ यांनी महापालिका आयुक्तांना दिले. शहराच्या सर्व दिशांना मेट्रोचे जाळे निर्माण करण्यासाठी नियोजित शेवाळेवाडी- हडपसर- कात्रज या मार्गाचा विस्तार चांदणी चौक– वाकडपर्यंत करण्यात येणार आहे. या विस्तारित मार्गाचा नवीन सविस्तर प्रकल्प अहवाल तयार करण्याचे निर्देश मोहोळ यांनी मेट्रो प्रशासनाला दिले.