Pune Cycle Tour : प्रस्तावित पुणे ग्रँड सायकल टूर स्पर्धेसाठी पुणे महापालिका १६७ कोटी रुपयांचा खर्च करणार आहे. या पार्श्वभूमीवर माजी विरोधी पक्षनेते उज्ज्वल केसकर, सुहास कुलकर्णी आणि माजी नगरसेवक प्रशांत बधे यांनी खर्चाबाबत अनेक प्रश्न उपस्थित केले आहेत. प्रभारी मुख्य अभियंता (पथ) राजेश बनकर यांना निवेदन देत स्पर्धेसंदर्भातील सर्व अंदाजपत्रके, तांत्रिक मंजुरी, इस्टिमेट समितीने मंजूर केलेले प्रस्ताव आणि खर्चाचा तपशील तातडीने सार्वजनिक करण्याची मागणी त्यांनी केली आहे.

निवेदनानुसार, स्पर्धेच्या मार्गावरील रस्त्यांच्या सरफेसिंग व दुरुस्तीसाठी ४० कोटी खर्च करण्यात येणार आहे. मात्र, स्पर्धेचा अंतिम मार्ग, त्याचा नकाशा आणि कोणत्या रस्त्यांवर कामे केली जाणार आहेत, याची माहिती अद्याप जाहीर झालेली नाही. ही माहिती पालिकेच्या संकेतस्थळावर प्रसिद्ध करावी, अशी मागणी केली आहे. मागील वर्षी ज्या रस्त्यांवर सायकल स्पर्धा झाली, त्याच रस्त्यांवर पुन्हा रिसर्फेसिंगची गरज का निर्माण झाली, याची चौकशी करावी.

संबंधित कामे दोषदायित्व (डिफेक्ट लायबिलिटी) कालावधीत येत असल्यास ती संबंधित कंत्राटदारांकडून करून घेण्याचा विचार झाला का, असा प्रश्नही उपस्थित केला आहे. तसेच रस्ते दुरुस्तीसाठी १०० कोटी रुपयांची तरतूद केली असताना पुन्हा ५२ कोटींची निधी कशासाठी खर्च करणार आहे, याचे स्पष्टीकरण देण्याची मागणीही केली आहे.

पालिकेकडे स्वतःचा डांबर प्रकल्प आणि यंत्रणा असताना सरफेसिंगसाठी खासगी कंत्राटदारांची आवश्यकता काय, १३५ किलोमीटरच्या मार्गापैकी केवळ १३ किलोमीटर फुटपाथ सुधारणा का होणार, आठ किलोमीटर उंचावलेल्या पादचारी क्रॉसिंगवर नेमकी कोणती कामे होणार, तसेच मार्गावरील १,६२० मॅनहोल समपातळीवर आणण्याबाबत पूर्वी कोणती कारवाई झाली, याची माहितीही मागण्यात आली आहे.