PMC News – पुणे जिल्हा स्थानिक स्वराज्य संस्था विधान परिषदेची निवडणूक बिनविरोध झाल्याने महापालिकेला चांगलाच दिलासा मिळाला आहे. या निवडणुकीच्या आचारसंहितेमुळे शहरातील पाणीकपातीसह, पालखी सोहळ्याची तसेच पावसाळ्यातील तातडीच्या कामांसाठीच्या निविदा या निवडणुकीच्या आचारसंहितेच्या कचाट्यात अडकल्या होत्या. त्यामुळे, पालिकेस धोरणात्मक निर्णय घेण्यासाठी जून महिन्याच्या अखेरपर्यंत वाट पाहावी लागली असती.

मात्र, आता पुढील एक-दोन दिवसांतच ही आचारसंहिता शिथिल होणार असल्याने पालिका प्रशासन तसेच पालिकेच्या पदाधिकाऱ्यांना मोठा दिलासा मिळणार असून, महापालिकेतील बैठका पुन्हा नियमित सुरू होण्याचा मार्ग मोकळा झाला आहे. आचारसंहितेच्या काळात तातडीच्या कामांसाठी बैठका घेण्यास जिल्हा प्रशासनाने मान्यता दिली होती. मात्र, कोणताही निर्णय घेण्यास मज्जाव केला होता. त्यामुळे, पालिकेचे कामकाज जवळपास ठप्पच झाले होते.

तातडीचे निर्णय रखडले..
शहरात जुलै महिन्याच्या पहिल्याच आठवड्यात पालखी सोहळा येत आहे. त्यासाठी तातडीच्या कामांच्या निविदा आचारसंहितेच्या प्रक्रियेत अडकल्या आहेत. याशिवाय, खडकवासला धरणातील पाणीसाठ्याने तळ गाठल्याने शहरात दिवसाआड पाणी देण्याचे प्रशासनाचे नियोजन असून, त्याबाबतचा धोरणात्मक निर्णय प्रशासनाला घ्यावा लागणार होता. मात्र, आचारसंहिता शिथिल झाल्याने पालिकेतील सत्ताधारी भाजपसह सर्व पक्षांच्या प्रमुखांची तातडीची बैठक घेऊन हा निर्णय घेतला जाण्याची शक्यता आहे.

याशिवाय, पावसाळापूर्व कामांचे अनेक प्रस्तावही रखडलेले असून, त्यांच्या मान्यतांचा मार्गही मोकळा झाला आहे. त्यामुळे पुढील आठवड्यात सोमवार (दि. ८) नंतर पालिकेचे कामकाज नियमित सुरू होण्याचा मार्ग मोकळा झाला आहे. तसेच, पालिकेने घेतलेल्या अभियंत्या भर्तीचा निकालही पुढील काही दिवसांतच जाहीर केला जाण्याची शक्यता आहे.