Sharad Pawar : भाजप आमदार गोपीचंद पडळकर यांनी शरद पवारांच्या राष्ट्रवादीचे माजी प्रदेशाध्यक्ष आणि आमदार जयंत पाटील यांच्यावर अत्यंत खालच्या शब्दांत टीका केली आहे. या टीकेचे तीव्र पडसाद उमटायला सुरूवात झाली आहे. त्यांनी केलेल्या वक्तव्याचा तीव्र शब्दांत निषेध शरद पवारांच्या राष्ट्रवादी काँग्रेस पक्षातील नेत्यांनी नोंदविला असून, आता या प्रकरणी पक्षाचे अध्यक्ष शरद पवार यांनी थेट मुख्यमंत्री देवेंद्र फडणवीस यांना फोन केला असल्याची माहिती समोर आली आहे.

पडळकरांनी केलेल्या टीकेबद्दल पवारांनी मुख्यमंत्र्यांशी फोनवरून चर्चा केली आहे. फोनवरून शरद पवारांनी अशी टीका करणं योग्य नाही, बेताल वक्तव्य करणाऱ्यांना आवरा, असं थेट मुख्यमंत्र्यांना म्हटलं असल्याची माहिती मिळत आहे. जयंत पाटील यांच्यावर आणि त्यांच्या वडिलांबाबत अत्यंत हीन पद्धतीने केलेल्या विधानावर आमदार गोपीचंद पडळकर हे वादाच्या भोवऱ्यात सापडले आहेत.

राष्ट्रवादी काँग्रेस पक्षाचे अध्यक्ष अजित पवार यांनी देखील यावर भाष्य केलं आहे. राष्ट्रवादी पवार गटामध्ये मोठी नाराजी पडळकरांनी केलेल्या टीकेमुळे पसरली आहे, यामुळे प्रचंड आक्रोश निर्माण झाला आहे. ज्या खालच्या थराला जाऊन टीका होत आहे, ती काही महाराष्ट्राची संस्कृती नाही, असं म्हणत पवारांनी नाराजी व्यक्त केली. यामुळे आता या प्रकरणी मुख्यमंत्री काय भूमिका घेतात, याकडे सर्वांचं लक्ष लागलं आहे.

गोपीचंद पडळकरांची खालच्या शब्दांत टीका 

माणसं पाठवली. कशासाठी? गोपीचंद पडळकरने कुठल्या व्यापाऱ्याकडून पैसे घेतले का? घ्या एखादा मधला व्यापारी घ्या आणि त्याच्यावर खंडणीचा गुन्हा दाखल करा. अरे जयंत पाटला तुझ्या सारखा भिकारी अवलाद गोपीचंद पडळकरची नाही. माझ्यात कार्यक्रम करायची ती धमक आहे. तुझ्यासारखी ती अवलाद नाही. एवढ्या खालच्या लेव्हलला? आता माझा दांडीयाचा कार्यक्रम आहे. ये बघायला.

तुझे डोळे दिपून जातील कार्यक्रम बघून, असं म्हणत आमदार गोपीचंद पडळकरांनी जयंत पाटील यांचा एकेरी उल्लेख केला आहे. याशिवाय जयंत पाटील यांच्या वडिलांचा उल्लेख करत जयंत पाटील हे राजारामबापू पाटील यांची औवलाद वाटत नाही, काही तरी गडबड आहे का? अशी अत्यंत खालच्या शब्दांत टीका पडळकरांनी केली आहे. यामुळे आता ते वादाच्या भोवऱ्यात सापडले आहेत.

हेही वाचा : “राज्यातील मुस्लिम लोकसंख्या ९० टक्क्यांपर्यंत…” ; भाजपच्या एआय व्हिडिओवर ओवैसींचे सडेतोड प्रत्युत्तर