Nigdi Chakan Metro – स्वारगेट ते पिंपरीनंतर आता निगडीपर्यत मेट्रोचे काम सुरु असून मेट्रोचा विस्तार चाकणपर्यंत होणार आहे. त्यासाठी लोकप्रतिनिधी व नागरिकांच्या सूचनांचा अंतर्भाव करून महामेट्रोकडून नवीन सुधारित सविस्तर प्रकल्प आराखडा अर्थात डीपीआर तयार करण्यात आला आहे. या डीपीआरमध्ये चाकण मेट्रो भोसरीगाव मार्गे जाण्यासाठी मोठा बदल सुचविण्यात आला आहे.

नाशिकफाट्यावरून वल्लभनगर, टेल्को रस्ता, लांडेवाडीतून भोसरीगावात मेट्रोचा मार्ग वळविण्यात आला आहे. लवकरच महापालिका सर्वसाधारण सभेच्या मान्यतेनंतर या प्रकल्पावर पुढे कार्यवाही सुरु होणार आहे. सुधारित आराखड्यानुसार निगडी ते चाकण हा मेट्रो मार्ग एकूण ४५.२ किलोमीटर लांबीचा असणार आहे. या मार्गावर पूर्वी ३१ मेट्रो स्थानके प्रस्तावित होती.

परंतु, मार्गात बदल सुचविल्यानंतर मेट्रो स्थानकांची संख्या वाढली असून आता एकूण ३४ स्थानके प्रस्तावित करण्यात आली आहेत. या प्रकल्पाचा अंदाजित खर्च सुमारे १२ हजार ९३७ कोटी रुपये आहे. सुरुवातीच्या टप्प्यात दररोज सुमारे ३ लाख ३२ हजार प्रवाशांना सेवा देण्याची क्षमता या मेट्रो मार्गात असणार आहे.

हा मेट्रो मार्ग निगडी, भक्ती-शक्ती चौक, ट्रान्सपोर्टनगर, रावेत, पुनावळे, ताथवडे, भुमकर चौक, वाकड, भुजबळ चौक, विशालनगर कॉर्नर, पिंपळे सौदागर, पिंपळे गुरव, नाशिक फाटा, संत तुकारामनगर, वायसीएम रुग्णालय, गवळीमाथा, टेल्को रस्ता, लांडेवाडी, भोसरीगाव, पांजरपोळ, मोशी ते चाकण या महत्त्वाच्या भागांना जोडणार आहे.

प्रवाशांच्या सोयीसाठी भुजबळ चौक ते वाकड या दरम्यान दोन्ही मेट्रो मार्गांची रचना अधिक सुलभ करण्यात येणार आहे. तसेच, मेट्रो स्थानकांच्या परिसरात वाहनतळ (पार्किंग) सुविधा उभारण्याची योजना आखण्यात आली आहे, ज्यामुळे ‘लास्ट माईल कनेक्टिव्हिटी’ सुधारण्यास मदत होईल. पिंपरी-चिंचवडमधील वाढती लोकसंख्या, औद्योगिक विस्तार आणि वाढती वाहतूक कोंडी लक्षात घेता हा मेट्रो प्रकल्प अत्यंत महत्त्वाचा मानला जात आहे.

चाकण औद्योगिक क्षेत्राशी थेट जोडणी आणि संपूर्ण पिंपरी-चिंचवड शहराला वर्तुळाकार मेट्रो मार्ग असल्यामुळे कामगार, नोकरदार, विद्यार्थी आणि व्यावसायिकांच्या दृष्टीने हा मेट्रो प्रकल्प महत्त्वाचा ठरेल. निगडी ते चाकण आराखड्यात काही सुधारणा सुचविण्यात आल्या होत्या. त्यापैकी या मार्गात नाशिक फाट्यावरून मेट्रो भोसरीगावठाण मार्गे पुढे चाकणला जावी, अशी आग्रही मागणी करण्यात आली होती.

त्या संदर्भात प्रमुख बदल करण्याबाबत महामेट्रोकडून सुचविण्यात आले आहे. नाशिकफाट्यानंतर भोसरी, एमआयडीसी, लांडेवाडी, भोसरीगाव या भागांना जोडण्यासाठी बदल केलेला आहे. परंतु, त्यासाठी पुणे-नाशिक महामार्गावरील भोसरीतील उड्डाणपूल पाडणे आवश्यक आहे, असे महामेट्रोने स्पष्ट केलेले आहे.