Maharashtra Kesari 2026 Day 4 Morning  Results : पुणे जिल्ह्यातील वाघोली येथे सुरू असलेल्या ६८ व्या महाराष्ट्र केसरी कुस्ती स्पर्धेचा चौथा दिवस सोलापूर आणि कोल्हापूरच्या मल्लांनी गाजवला. विविध वजनगटांतील उपांत्य फेरीच्या लढतींनंतर आता सुवर्णपदकासाठी कोणामध्ये झुंज होणार, याचे चित्र स्पष्ट झाले आहे.

वाघोलीतील स्व. अजितदादा पवार क्रीडानगरी’त रंगलेल्या ६८ व्या महाराष्ट्र केसरी स्पर्धेत गुरुवारी माती आणि गादी या दोन्ही विभागांत अटीतटीच्या लढती पाहायला मिळाल्या. विशेषतः ६५, ७४ आणि ९२ किलो गटात मल्लांनी आपल्या कौशल्याने प्रेक्षकांच्या डोळ्यांचे पारणे फेडले.

माती विभाग: सोलापूरच्या मल्लांनी मारली बाजी –

६५ किलो माती विभागात सोलापूरच्या शनिराज निंबाळकरने छत्रपती संभाजी नगरच्या जुनेद शेखचा १२-४ असा पराभव केला. दुसऱ्या लढतीत सोलापूरच्याच अविराज मानेने कोल्हापूरच्या सद्दाम शेखवर ९-८ अशी निसटती मात करत अंतिम फेरीत धडक मारली. ७४ किलो गटात साताऱ्याच्या तेजस गोफणेने ११-० असा एकतर्फी विजय मिळवला, तर कोल्हापूरच्या सौरभ पाटीलने १०-५ अशा फरकाने विजय मिळवत फायनल गाठली. ९२ किलो गटात पुण्याच्या निरंजन मारणेने बाजी मारली असून त्याची गाठ सोलापूरच्या श्रीनाथ गोरेशी पडणार आहे.

गादी विभाग: कोल्हापूरच्या मल्लांचा दबदबा –

गादी विभागात ६५ किलो गटात सोलापूरच्या आंतरराष्ट्रीय मल्ल ज्योतिबा अटकळेने कोल्हापूरच्या आर्यन पाटीलचा १०-० असा धुव्वा उडवला. ७४ किलो गटात कोल्हापूरच्या आदर्श पाटीलने १२-१ अशा मोठ्या फरकाने विजय मिळवला, तर अनप पाटीलने ११-९ अशा चुरशीच्या लढतीत बाजी मारली. ९२ किलो गटात कोल्हापूरच्या श्रेयस गाटने १४-३ अशा फरकाने अमोल दिंडेला नमवले, तर पुण्याच्या ओंकार येलभरने १०-० अशा गुणाधिक्याने अंतिम फेरीत प्रवेश केला.

हेही वाचा – SLC NOC : “आधी परीक्षा, मग आयपीएल! श्रीलंकन बोर्डाचा कडक फतवा; पथिराणा-हसरंगामुळे ‘या’ संघांच्या वाढल्या अडचणी

या निकालांमुळे कोल्हापूर आणि सोलापूर जिल्ह्यांमध्ये पदकांची मोठी लूट होण्याची शक्यता निर्माण झाली आहे. आता कुस्ती शौकिनांचे लक्ष उद्या होणाऱ्या अंतिम लढतींकडे लागले आहे.