Mahalakshmi Temple- सारसबाग येथील श्री महालक्ष्मी मंदिरातर्फे बुधवारी महिला शास्त्रज्ञांचा सन्मान आयसरचे संचालक डॉ. सुनील भागवत यांच्या हस्ते करण्यात आला. या वेळी विश्वकर्मा विद्यापीठ, पुणे उपाध्यक्ष प्रा. डॉ. वासुदेव गाडे, मंदिर ट्रस्टच्या प्रमुख विश्वस्त अमिता अग्रवाल, विश्वस्त आणि उत्सव प्रमुख डॉ. तृप्ती अग्रवाल, विश्वस्त भरत अग्रवाल, अ‍ॅड. प्रताप परदेशी, प्रवीण चोरबेले आदी उपस्थित होते.

कार्यक्रमात प्रा. डॉ. सुवर्णा दातार, डॉ. तेजश्री भावे, डॉ. पुराबी गाराई, डॉ. शिल्पा जैन, डॉ. मंजु मदान या महिला शास्त्रज्ञांचा गौरव करण्यात आला. विज्ञान समाजाला उत्तरदायी असले पाहिले, असे ज्येष्ठ शास्त्रज्ञ सी. व्ही. रमण यांनी सांगितले होते. पुढील पिढी ही स्पेस टेक्नालॉजीची आहे. संरक्षण आणि शिक्षण क्षेत्रात आजवर अनेक महिलांनी गौरवपूर्ण कामगिरी केली आहे.

त्यांची परंपरा आपण पुढे चालू ठेवल्याचा खूप आनंद होतो, अशी भावना डाॅ. भागवत यांनी व्यक्त केली. मंदिरातर्फे नवरात्रोत्सवात नारी शक्तीचा सन्मान करण्यात येतो. आपल्यासारख्या संशोधक महिलांनी आपल्या कर्तृत्वाने मानवी जीवन अधिक समृद्ध करण्याचा प्रयत्न केला. आपल्या कार्याचा सन्मान करण्याचे भाग्य आम्हाला लाभल्याचे भरत अग्रवाल म्हणाले. युवराज लाहोटी यांनी प्रास्ताविक केले. विशाल सोनी यांनी महिला शास्त्रज्ञांचा परिचय करून दिला. महाआरतीने कार्यक्रमाची सांगता झाली.

पुष्पवृष्टीत अष्टलक्ष्मी रथयात्रा
नवरात्रातील पहिल्या मंगळवारी श्री महालक्ष्मी मंदिरासमोर भंडाऱ्याची उधळण आणि पुष्पवृष्टीत अष्टलक्ष्मी रथयात्रा मिरवणूक काढण्यात आली. मंदिरासमोर पुष्पवृष्टी करून रथयात्रेचे स्वागत करण्यात आले. विश्वकर्मा विद्यापीठातील पदाधिकारी, मंदिराचे कार्यकर्ते आणि राजेश अंबिके, शेखर निवंगुणे यांच्या सहकार्याने हा सोहळा पार पडला. मंदिराबाहेर दररोज सायंकाळी ७.३० वाजता गंगा आरती आयोजन करण्यात येते.