Navratri Festival : नवरात्रोत्सवानिमित्त सारसबाग येथील श्री महालक्ष्मी मंदिरात आयोजित सामूहिक श्रीसूक्त आणि श्री गणपती अथर्वशीर्ष पठणाला भाविकांचा उत्स्फूर्त प्रतिसाद मिळाला. शंखनाद, ‘जय माता दी’चा जयघोष आणि श्रीसूक्ताच्या सामूहिक पठणाने मंदिर परिसर भक्तिमय झाला.

श्री महालक्ष्मी मंदिर, सारसबाग यांच्या वतीने सार्वजनिक नवरात्रोत्सवाचे आयोजन करण्यात आले आहे. त्याअंतर्गत झालेल्या या कार्यक्रमात महिला आणि पुरुष भाविक मोठ्या संख्येने सहभागी झाले होते. पारंपरिक वेशातील महिलांनी ‘जय माता दी’चा जयघोष केला. शंखनाद पथकाच्या शंखवादनाने कार्यक्रमाची सुरुवात झाली.

यावेळी श्रीसूक्ताचे महत्त्व आणि त्याचा धार्मिक संदर्भ उपस्थितांना सांगण्यात आला. त्यानंतर ओंकार, श्री गणपती अथर्वशीर्षाचा एक पाठ आणि श्रीसूक्ताचे तीन पाठ सामूहिकरित्या करण्यात आले. आरतीने कार्यक्रमाची सांगता झाली.

कार्यक्रमाला डॉ. सतीश देसाई, मंदिराच्या प्रमुख विश्वस्त अमिता अग्रवाल, विश्वस्त डॉ. तृप्ती अग्रवाल, भरत अग्रवाल, ॲड. प्रताप परदेशी, प्रवीण चोरबेले, हेमंत अर्नाळकर यांच्यासह विश्वस्त आणि पदाधिकारी उपस्थित होते. संस्थापक विश्वस्त राजकुमार अग्रवाल आणि प्रमुख विश्वस्त अमिता अग्रवाल यांच्या मार्गदर्शनाखाली कार्यक्रम झाला.

डॉ. तृप्ती अग्रवाल यांनी सांगितले की, सामूहिक श्रीसूक्त पठणातून महिलांनी एकत्र येऊन स्त्रीशक्तीचा जागर करावा, हा या उपक्रमामागील उद्देश आहे. नवरात्रोत्सवाच्या काळात महालक्ष्मी देवीची आराधना आणि सामूहिक भक्तीचा अनुभव भाविकांना मिळावा, यासाठी दरवर्षी हा कार्यक्रम आयोजित केला जातो.

श्रीसूक्त हे ऋग्वेदातील महालक्ष्मी देवीच्या स्तुतीसाठी समर्पित वैदिक स्तोत्र असल्याचेही त्यांनी सांगितले. सुख, समृद्धी, शांती आणि कल्याणासाठी देवीची उपासना केली जाते. सामूहिक पठणातून भक्ती आणि सकारात्मक वातावरणाचा संदेश देण्याचा प्रयत्न असल्याचे त्यांनी स्पष्ट केले.