Maan news – छत्रपती शिवाजी महाराजांनी दूरदृष्टीतून माण तालुक्यात उभारलेल्या ऐतिहासिक महिमानगड गिरीदुर्गाला लवकरच राज्य संरक्षित स्मारकाचा दर्जा मिळणार आहे. पुरातत्त्व व वस्तुसंग्रहालये संचालनालयाने याबाबतच्या अधिसूचनेचा प्रस्ताव अंतिम मंजुरीसाठी राज्य शासनाच्या पर्यटन व सांस्कृतिक कार्य विभागाकडे सादर केला आहे. त्यामुळे या किल्ल्याच्या संवर्धनाबरोबरच पर्यटन विकासाला मोठी चालना मिळणार आहे.

अमोल एकळ फाउंडेशनच्या पुढाकाराने शिवप्रेमी व इतिहास अभ्यासकांकडून महिमानगड किल्ल्याच्या जतन व संवर्धनासाठी गेल्या काही वर्षांपासून सातत्याने पाठपुरावा सुरु होता. या प्रक्रियेसाठी माणचे तहसीलदार विकास आहिर यांनी किल्ल्याशी संबंधित सर्व महसुली कागदपत्रे, नकाशे आणि ७/१२ उतारे पुणे पुरातत्त्व विभागाकडे सुपूर्द केले होते.

त्यानंतर अमोल एकळ, विजय चव्हाण आणि नंदकुमार कुचेकर यांनी पुणे पुरातत्त्व विभागाचे सहाय्यक संचालक डॉ. विलास वाहने यांची भेट घेऊन किल्ल्याच्या संरक्षणाबाबत सविस्तर चर्चा केली. या पाठपुराव्याला यश मिळत पुणे विभागीय कार्यालयाने गेल्या एप्रिलमध्ये संबंधित प्रस्ताव मुंबईच्या संचालनालयाकडे पाठवला. पुरातत्व व संग्रहालय विभागाचे संचालक तेजस गर्गे यांनी गेल्या सोमवारी (दि. ८) हा अंतिम प्रस्ताव मंजुरीसाठी मंत्रालयातील उपसचिवांकडे सादर केला आहे.

आता या प्रस्तावाच्या अनुषंगाने महाराष्ट्र प्राचीन स्मारके व पुरातत्त्ववास्तू शास्त्रविषयक स्थळे व अवशेष अधिनियमानुसार महिमानगडला राज्य संरक्षित स्मारक घोषित करण्याची अधिसूचना शासकीय राजपत्रात प्रसिद्ध केली जाणार आहे. त्यानंतर दोन महिन्यांच्या कालावधीत हरकती व सूचना मागविण्यात येतील. या सर्व प्रक्रिया पूर्ण होताच महिमानगडला अधिकृतपणे राज्य संरक्षित स्मारकाचा दर्जा प्राप्त होणार आहे.