Khed RTE Scam- आरटीई 25 टक्के प्रवेश प्रक्रियेत शाळेत प्रवेश मिळविण्यासाठी रहिवासी पत्त्याची कागदपत्रे सादर करून शासनाची दिशाभूल केल्याच्या आरोपावरून खेड पोलिसांनी 14 पालकांविरुद्ध गुन्हा दाखल केला आहे. याबाबत खेड पंचायत समितीचे गटशिक्षणाधिकारी अमोल विजय जंगले यांनी फिर्याद दिली आहे.

फिर्यादीनुसार, मार्च ते मे 2026 या कालावधीत राजगुरुनगर येथील पंचायत समितीच्या तालुकास्तरीय समितीकडे काही पालकांनी त्यांच्या पाल्यांच्या आरटीई प्रवेशासाठी रहिवासी पुराव्याची कागदपत्रे सादर केली. संबंधित कागदपत्रांवर नमूद केलेल्या पत्त्यावर पालक वास्तव्यास नसतानाही त्या कागदपत्रांच्या आधारे आरटीई अंतर्गत प्रवेश घेण्याचा प्रयत्न केल्याचा आरोप आहे.

या प्रकरणी गणेश अरुण साळुंखे, सतीश दत्तात्रय गुंड, उत्तरेश्वर आधुबा गोचडे, योगेश बबन सातपुते, राहुल भगवान चौधरी, अजय मच्छिंद्रनाथ विरकर, संदीप दादा शिंदे, रमाकांत आनंदराव चव्हाण (सर्व रा. हनुमानवाडी, केळगाव, आळंदी देवाची), समीर रामचंद्र गोरे (रा. आळंदी देवाची), वैभव होणाजी मोहिते (रा. शेलपिंपळगाव), दयानंद फकीरप्पा कुंभार (रा. यमुनानगर, आंबेठाण रोड, चाकण),

संदीप भीमराव कांदेकर-पाटील (रा. ऐश्वर्या अंगण, आंबेठाण पार्क), निलेश देवराव शेकार (रा. गणेश कॉलनी, शिक्रापूर रोड, दत्तवाडी, भोसे) आणि अंगद दिलीप राऊत (रा. आंबेठाण चौक, चाकण) यांच्याविरुद्ध गुन्हा दाखल करण्यात आला आहे. यापैकी दहा पालकांच्या पाल्यांसाठी आळंदी देवाची येथील डॉ. विश्वनाथ कराड वर्ल्ड पीस स्कूल,

तर उर्वरित चार पालकांच्या पाल्यांसाठी आंबेठाण येथील पोदार इंटरनॅशनल स्कूलमध्ये आरटीई प्रवेशासाठी कागदपत्रे सादर करण्यात आल्याचे फिर्यादीत नमूद आहे. याप्रकरणी भारतीय न्याय संहितेच्या कलम 318(4), 336(3) व 3(5) अन्वये कारवाई करण्यात आली आहे. खेड पोलिस ठाण्याचे प्रभारी अधिकारी पोलीस निरीक्षक महेश विधाते यांच्या मार्गदर्शनाखाली सहाय्यक पोलीस निरीक्षक राऊळ पुढील तपास करीत आहेत.