MSEDCL News- महावितरणच्या विजेच्या तारा, ट्रान्सफॉर्मर दुरुस्ती किंवा थकीत बिलांसाठी मीटर काढण्यासारखी धोकेदायक कामे स्वतः न करता खासगी व्यक्तींकडून करून घेणे आता कर्मचाऱ्यांना महागात पडणार आहे. असा बेकायदेशीर प्रकार समोर आल्यास संबंधित कर्मचाऱ्याची चौकशी करून त्याला थेट नोकरीवरून काढून टाकले जाईल, असा इशारा महावितरण प्रशासनाने दिला आहे.

यासंदर्भात सर्व प्रादेशिक कार्यालयांना तातडीने अंमलबजावणीचे आदेश दिले आहेत. महावितरणच्या वीजपुरवठा यंत्रणेची देखभाल, ग्राहकांच्या तक्रारी सोडवणे, नादुरुस्त ट्रान्सफॉर्मर बदलणे, फ्यूज जोडणे, थकबाकीदारांचे मीटर काढणे आणि वीजबिल वसुली सर्व जबाबदारी कंपनीच्या अधिकृत कर्मचाऱ्यांची आहे. ही सर्व कामे धोकादायक व सुरक्षेच्या दृष्टीने संवेदनशील असतात.

मात्र, महावितरणचे काही कर्मचारी स्थानिक खासगी व्यक्ती किंवा अनधिकृत माणसांकडून ही कामे करून घेत असल्याचे उघड झाले असून, याबाबतच्या अनेक तक्रारी वरिष्ठ अधिकाऱ्यांपर्यंत पोहोचल्या होत्या. महावितरणबाहेरील व्यक्तींकडे विजेच्या कामाचे कोणतेही योग्य प्रशिक्षण किंवा तांत्रिक ज्ञान नसते. सुरक्षेच्या साधनांशिवाय विजेचा खांब किंवा ट्रान्सफॉर्मरवर काम करताना गंभीर अपघात होऊन निष्पाप व्यक्तींचा जीव जाण्याचा मोठा धोका असतो.

यामुळे ग्राहकांच्या उपकरणांचे आणि कंपनीच्या मालमत्तेचेही नुकसान होते. विद्युत सुरक्षेच्या नियमांनुसार फक्त अधिकृत कर्मचाऱ्यांनाच असे काम करण्याची परवानगी आहे. अनधिकृत व्यक्तीला कामावर लावणे हा कायदा आणि नियमांचा भंग मानला जातो. या गंभीर प्रकाराची तातडीने दखल घेत महावितरणचे संचालक धनंजय औंढेकर यांनी आदेश जारी केले आहेत.

आपल्या भागात कुठेही खासगी माणसांकडून विजेची कामे करून घेतली जात नाहीत ना, याची वरिष्ठ अधिकाऱ्यांनी स्वतः खात्री करावी, असे त्यांनी स्पष्ट केले आहे. एखाद्या कर्मचाऱ्याने खासगी व्यक्तीकडून काम करून घेतल्याचे आढळले किंवा त्यामुळे अपघात घडल्यास त्याची तातडीने चौकशी केली जाईल व दोष सिद्ध झाल्यास संबंधित कर्मचाऱ्याला थेट सेवेतून बडतर्फ केले जाईल, असे महावितरणने स्‍पष्ट केले आहे.