India Historic Performance in Aichi Nagoya Para Asian Games 2026 : जपानमधील आयची-नागोया येथे पार पडलेल्या पॅरा आशियाई क्रीडा स्पर्धा २०२६ मध्ये भारतीय खेळाडूंनी अद्भूत कामगिरी करत नवा इतिहास रचला आहे. भारताने स्पर्धेत तब्बल ११४ पदकांची ऐतिहासिक कमाई करत देशाच्या पॅरा क्रीडा इतिहासातील आतापर्यंतचे सर्वोत्तम प्रदर्शन नोंदवले. विशेष बाब म्हणजे, भारताने गेल्या आवृत्तीच्या तुलनेत जवळपास निम्म्या खेळाडूंचे पथक पाठवले होते; मात्र तरीही पदकांच्या संख्येत उल्लेखनीय वाढ करत भारतीय पॅरा ॲथलीट्सनी आपली जागतिक गुणवत्ता सिद्ध केली आहे.

अवघ्या १६८ खेळाडूंची ऐतिहासिक भरारी; १०८ पदकांचा विक्रम मोडीत

चीनमधील हांगझोऊ येथे २०२३ मध्ये झालेल्या मागील स्पर्धेत भारताने ३०९ खेळाडूंचे मोठे पथक उतरवले होते आणि १०८ पदके जिंकली होती. या वेळी जपानमध्ये भारताचे केवळ १६८ खेळाडू सहभागी झाले होते. या मर्यादित खेळाडूंनी जिद्दीच्या जोरावर ३० सुवर्ण, ३५ रौप्य आणि ४९ कांस्य अशी एकूण ११४ पदके पटकावत मागील सर्व विक्रम इतिहासजमा केले. २०१० च्या क्वांगचौ स्पर्धेतील अवघ्या १४ पदकांपासून सुरू झालेला हा प्रवास आज ११४ पदकांवर पोहोचला आहे.

पॅरा ॲथलेटिक्स आणि बॅडमिंटनमध्ये पदकांचा पाऊस –

#WATCH | Delhi: Para-powerlifting athletes, who returned after winning silver medals at the Asian Para Games held in Japan, receives a grand welcome at the airport. https://t.co/z492MRis3p

— ANI (@ANI) October 25, 2026

भारताच्या या ऐतिहासिक यशात पॅरा ॲथलेटिक्सचा वाटा सर्वाधिक राहिला. एकट्या ॲथलेटिक्समध्ये भारतीय खेळाडूंनी २२ सुवर्ण, १९ रौप्य आणि २४ कांस्य अशी तब्बल ६५ पदके जिंकली. दुसऱ्या स्थानी राहिलेल्या पॅरा बॅडमिंटनमध्ये १६ पदके मिळाली. याशिवाय पॅरा जलतरणात ११, पॅरा टेबल टेनिसमध्ये ७, पॅरा तिरंदाजीत ६ आणि पॅरा नेमबाजीत ५ पदके भारताने खिशात घातली. ॲथलेटिक्स आणि बॅडमिंटन या दोन खेळांनी भारताच्या एकूण पदकांपैकी ७० टक्क्यांहून अधिक पदके मिळवून दिली.

पदकतालिकेत भारताचे चौथे स्थान अबाधित –

🏅MEDAL STANDINGS🏅
Aichi-Nagoya 2026 Asian Para Games – Oct. 24

🥇People’s Republic of China
🥈Japan
🥉Uzbekistan

全ての競技が終了し、メダルスタンディングスが確定しました👏

選手の皆さん、最高の熱狂をありがとう！

#アジアパラ大会 #愛知名古屋2026 https://t.co/IeihTQm4Kq

— 愛知・名古屋2026アジアパラ競技大会/Aichi-Nagoya2026 (@AsianPara_2026) October 25, 2026

पदकतालिकेत चीनने ४३५ पदकांसह अव्वल स्थान मिळवले, तर यजमान जपानने १८६ पदकांसह दुसरे आणि उझबेकिस्तानने १४५ पदकांसह तिसरे स्थान पटकावले. भारताने दक्षिण कोरियाला मागे टाकत पदकतालिकेत आपले मानाचे चौथे स्थान यशस्वीरीत्या कायम राखले. कमी खेळाडू असतानाही आंतरराष्ट्रीय पातळीवर दाखवलेली ही सरस कामगिरी भारतीय पॅरा क्रीडा विश्वाची ताकद अधोरेखित करणारी ठरली आहे.

हेही वाचा – PV Sindhu Final : पी. व्ही. सिंधूचा फ्रान्समध्ये डंका! जपानी वादळाला नमवत फ्रेंच ओपनच्या अंतिम फेरीत दाखल; फायनलमध्ये नंबर १ चे आव्हान

आता दोहा २०३० च्या महाकुंभावर लक्ष्य –

मर्यादित संसाधने आणि कमी खेळाडूंमध्येही प्रत्येक संधीचे सोने करण्याची क्षमता या कामगिरीने दाखवून दिली आहे. आगामी काळात इतर खेळांमध्येही पदकांची संख्या वाढवणे भारतासाठी महत्त्वाचे ठरेल. पुढील पॅरा आशियाई क्रीडा स्पर्धा २०३० मध्ये कतारची राजधानी दोहा येथे रंगणार असून, तेथे पदकांचे नवे शिखर गाठण्याचे आणि आशियातील अव्वल तीन देशांना आव्हान देण्याचे भारताचे पुढील लक्ष्य असेल.