Shreyas Iyer Reaction : ‘माझ्या संघात प्रत्येक खेळाडू मॅच विनर’, कर्णधार श्रेयसने नमन-तिलक अन् नितीशच्या जिद्दीचे केले कौतुक
Shreyas Iyer Reaction : न्यूझीलंडविरुद्धच्या दुसऱ्या टी-२० सामन्यातील संघाच्या विजयामुळे कर्णधार श्रेयस अय्यर खूप आनंदित आहे. त्याने सांगितले की, त्याच्या संघातील सर्व खेळाडू सामना जिंकून देणारे आहेत. त्याने विशेषतः तिलक वर्मा आणि नितीश रेड्डी यांचे कौतुक केले, तसेच नमन धीरच्या क्षमतेचेही कौतुक केले.
Shreyas Iyer Reaction on IND vs NZ 2nd T20I : न्यूझीलंडविरुद्ध क्राइस्टचर्च येथे खेळल्या गेलेल्या दुसऱ्या टी-२० सामन्यात भारताने १ चेंडू आणि ४ गडी राखून रोमहर्षक विजय साकारला. १८१ धावांच्या आव्हानाचा पाठलाग करताना मधल्या फळीत पडझड झाल्यानंतर तिलक वर्मा, नितीश कुमार रेड्डी आणि नमन धीर यांनी दाखवलेल्या जिद्दीच्या जोरावर भारताने मालिकेत २-० अशी भक्कम आघाडी घेतली. सामन्यानंतर बोलताना कर्णधार श्रेयस अय्यर अत्यंत समाधानी दिसला. माझ्या संघात प्रत्येक खेळाडू मॅच विनर असून, आजच्या सामन्यात या युवा खेळाडूंनी ते सिद्ध करून दाखवले, अशा शब्दांत त्याने संघाचे कौतुक केले.
सलग विकेट्समुळे सामना निसटत होता; तिलक-नितीशने दाखवले धैर्य
सामन्यानंतरच्या सादरीकरणात बोलताना कर्णधार म्हणाला की, “एका क्षणी पाठोपाठ विकेट्स पडल्यामुळे सामना आपल्या हातातून निसटतो की काय अशी भीती वाटत होती. मात्र, अशा प्रचंड दबावाच्या परिस्थितीत तिलक वर्मा आणि नितीश रेड्डी यांनी अप्रतिम धैर्य दाखवले. या दोघांनी सामन्याचा रोख बदलला, तर नमन धीरने खेळलेली छोटी पण स्फोटक खेळी विजयाचा पाया रचण्यात अत्यंत महत्त्वाची ठरली”, असा प्रकारे अय्यरने युवा खेळाडूंच्या मानसिकतेची प्रशंसा केली.
नमन धीर हा उच्च दर्जाचा अष्टपैलू खेळाडू: श्रेयस अय्यर
🚨 CAPTAIN SHREYES IYER AFTER WINNING FROM NEW ZEALAND!! 🔥😍
“I feel that every individual in our game is a match winner, and today we saw the example of that.”
“Like honestly speaking, when we lost wickets, consecutive wickets especially, uh, we thought that the game was going away from us.”
“But, uh, Tilak and Reddy, they showed immense character, and also a great cameo by Naman dhir.”
— M Farhan (@MFarhan1200) October 24, 2026
नमन धीरच्या अष्टपैलू खेळावर भरभरून बोलताना कर्णधाराने स्पष्ट केले की, “वेस्ट इंडिजविरुद्धच्या घरच्या मालिकेतच नमनची क्षमता दिसून आली होती. तो केवळ आक्रमक फलंदाज नसून एक उत्तम गोलंदाज आणि चपळ क्षेत्ररक्षकही आहे. जेव्हा एखादा खेळाडू फलंदाजी, गोलंदाजी आणि क्षेत्ररक्षण या तिन्ही आघाड्यांवर इतके दर्जेदार योगदान देतो, तेव्हा तो संघासाठी अत्यंत मौल्यवान ठरतो. नमन हा खऱ्या अर्थाने उच्च दर्जाचा आणि परिपक्व खेळाडू आहे.”
सुरुवातीला डॉट बॉल्स खेळल्याची खंत; फिरकीपटूंचे नियंत्रण
THE CELEBRATIONS & EMOTION OF CAPTAIN SHREYAS IYER, TILAK VERMA & TEAM INDIA AFTER TODAY’S WIN.🥹❤️
– Team India, A family! https://t.co/Q0Euvgrjld
— Tanuj (@ImTanujSingh) October 24, 2026
धावांचा पाठलाग करताना मधल्या फळीत आलेल्या अडचणींवर बोलताना श्रेयसने कबूल केले की, “सुरुवातीला आम्ही जास्त निर्धाव (डॉट) चेंडू खेळलो, ज्यामुळे आवश्यक धावगती वाढली. न्यूझीलंडचे फिरकीपटू मिचेल सँटनर आणि मायकेल ब्रेसवेल यांनी खेळपट्टीचा फायदा घेत अचूक टप्प्यावर मारा केला. चेंडूवर सहज फटके मारणे कठीण होते; तिथे मोठे फटके मारण्याऐवजी गॅप शोधून एकेरी-दुहेरी धावा काढल्या असत्या, तर पाठलाग अधिक सोपा झाला असता. मात्र ही केवळ एका दिवसाची घसरण असून पुढच्या सामन्यात आम्ही यावर नक्कीच मात करू”, असा विश्वास त्याने व्यक्त केला.
क्षेत्ररक्षणाचा नवा मंत्र; ‘काम अजून अर्धच झालंय’ –
संघाच्या आक्रमक क्षेत्ररक्षणावर भाष्य करताना कर्णधाराने सांगितले की, प्रत्येक चेंडूवर प्रतिस्पर्धी फलंदाजांना दुसरी धाव घेण्यापासून रोखण्याचा स्पष्ट संदेश खेळाडूंना दिला होता. चेंडूच्या दिशेने आक्रमक धावल्यामुळे फलंदाजांवर दोन धावा घेताना दबाव निर्माण होतो. दरम्यान, मालिकेत २-० अशी आघाडी घेतली असली तरी आपले काम अजून अर्धच झाले असून उर्वरित सामन्यांवर पूर्ण लक्ष असल्याचे सांगत अय्यरने पुढील लढतींसाठी सज्ज असल्याचा इशारा दिला.
