India vs Bangladesh Woman Cricket 4th T20 Match : कर्णधार हरमनप्रीत कौरची शानदार खेळी आणि दीप्ती शर्माच्या नेतृत्वाखालील गोलंदाजांच्या प्रभावी कामगिरीच्या जोरावर भारताने पावसाने प्रभावित झालेल्या चौथ्या टी-20 सामन्यात सोमवारी(दि.6 मे 2024) बांगलादेशचा डकवर्थ लुईस नियमानुसार 56 धावांनी पराभव केला आणि मालिकेत 4-0 अशी अभेद्य आघाडी घेतली आहे. टीम इंडिया क्लीन स्वीपपासून फक्त एक सामना दूर आहे. हरमनप्रीत कौर सामन्याची मानकरी ठरली. उभय संघांमधील मालिकेतील शेवटचा आणि पाचवा सामना 9 मे रोजी होणार आहे.
Captain Harmanpreet Kaur led from the front in the 4th T20I and she becomes the Player of the Match 🏆👏
Scorecard ▶️ https://t.co/tYvVtPYh93#TeamIndia | #BANvIND | @ImHarmanpreet pic.twitter.com/1CtZt0qD5I
— BCCI Women (@BCCIWomen) May 6, 2024
14 षटकांच्या या सामन्यात नाणेफेक हरल्यानंतर भारताने प्रथम फलंदाजी करताना 6 विकेट गमावत 122 धावा केल्या. प्रत्युत्तरात यजमान संघ कधीही लक्ष्य गाठण्याच्या स्थितीत दिसला नाही आणि त्यांना सात गड्यांच्या मोबदल्यात 68 धावाच करता आल्या.
खरं तर, पावसाने प्रभावित झालेला हा सामना फक्त 14-14 षटकांचाच होता. भारताकडून हरमनप्रीत कौरने 26 चेंडूत 5 चौकाराच्या सर्वाधिक 39 धावा केल्या. तिच्याशिवाय स्मृती मंधानाने 22, डी हेमलताने 22 आणि ऋचा घोषने 24 धावा केल्या. 5 षटकांचा खेळ संपल्यानंतर पाऊस सुरू झाला आणि सामना 14 षटकांचा करण्यात आला. भारताने 14 षटकात 6 गडी गमावून 122 धावा केल्या.
यानंतर बांगलादेशचा डाव सुरू झाला. डकवर्थ लुईस नियमामुळे संघाला 125 धावांचे लक्ष्य मिळाले. भारताच्या गोलंदाजीसमोर बांगलादेशची फलंदाजी पूर्णपणे ढासळली. बांगलादेशकडून सलामीवीर दिलारा अख्तर (21), रुबिया हैदर (13) आणि शोरिफा खातून (नाबाद 11) यानांच दुहेरी धावसंख्या गाठता आली. भारताच्या गोलंदाजीपुढे बांगलादेशच्या फलंदाजांनी शरणागती पत्करली.
भारतासाठी दीप्ती शर्माने सर्वात किफायतशीर गोलंदाजी केली आणि केवळ 4.30 च्या इकॉनॉमीसह तीन षटकात 13 धावा देत 2 बळी घेतले. याशिवाय आशा शोभनानेही दोन बळी घेत संघाच्या विजयात महत्त्वाची भूमिका बजावली. त्यांच्याशिवाय पूजा वस्त्राकर आणि राधा यादव यांनी प्रत्येकी एक विकेट घेतली.
संक्षिप्त धावफलक –
भारत : 14 षटकात 122/6 (हरमनप्रीत कौर 39, ऋचा घोष 24; मारुफा अक्तर 2/24) विरूध्द बांगलादेश : 14 षटकांत 68/7 (दिलारा अक्तार 21; दीप्ती शर्मा 2/13)