छत्रपती संभाजीनगर : राष्ट्रवादी काँग्रेस (अजित पवार गट) पक्षात वादग्रस्त नेते सूरज चव्हाण यांच्या पुनर्वसनाने आणि त्यांच्या प्रदेश सरचिटणीसपदी नियुक्तीने राजकीय वर्तुळात खळबळ उडाली आहे. सूरज चव्हाण यांनी लातूर येथे छावा संघटनेच्या कार्यकर्त्यांना मारहाण केल्याप्रकरणी अजित पवार यांनी त्यांची युवक प्रदेशाध्यक्षपदावरून हकालपट्टी केली होती. मात्र, अवघ्या महिन्याभरातच पक्षाचे प्रदेशाध्यक्ष सुनील तटकरे यांनी चव्हाण यांना पुन्हा पक्षात घेऊन त्यांना मोठी जबाबदारी दिली आहे. विशेष म्हणजे, या निर्णयाबाबत अजित पवारांना काहीच माहिती नसल्याचं समोर आलं आहे, ज्यामुळे पक्षांतर्गत संभ्रम आणि टीकेचं वातावरण निर्माण झालं आहे. अजित पवारांचं स्पष्टीकरण सूरज चव्हाण यांच्या नियुक्तीवर पत्रकारांनी विचारलेल्या प्रश्नाला उत्तर देताना अजित पवार म्हणाले, “मला ती गोष्ट माहिती नाही. मी त्या बैठकीला नव्हतो. मी त्याबद्दलची माहिती घेतो. मला त्यावेळेस जे खटकलं, मी त्याबद्दलचा निर्णय घेतला. ज्या गोष्टी मला खटकतात, त्याबाबत मी तडकाफडकी निर्णय घेत असतो.” यावरून अजित पवारांना या नियुक्तीच्या निर्णय प्रक्रियेत सहभागी न केल्याचं स्पष्ट होतं, ज्यामुळे पक्षाच्या कोअर कमिटीच्या निर्णयप्रक्रियेवर प्रश्नचिन्ह उपस्थित झालं आहे. पक्षांतर्गत आणि विरोधकांची टीका सूरज चव्हाण यांच्या नियुक्तीवर सामाजिक कार्यकर्त्या अंजली दमानिया आणि शरद पवार गटाचे आमदार रोहित पवार यांनी तीव्र टीका केली आहे. अंजली दमानिया यांनी ट्विटरवर अजित पवार यांच्या जुन्या ट्विटचा स्क्रीनशॉट शेअर करत म्हटलं, “२१ जुलैला अजित पवारांनी सूरज चव्हाण यांना पक्षातून काढलं होतं, पण २३ दिवसांतच त्यांना सरचिटणीसपदी नियुक्त केलं. अशा पक्षाला आणि नेत्याला काय म्हणायचं?” त्यांनी अजित पवार यांच्या विश्वासार्हतेवरही प्रश्न उपस्थित केले. रोहित पवार यांनीही ट्विटरवरून अजित पवारांना लक्ष्य करत म्हटलं, “लातूरमधील गुंडगिरीप्रकरणी सूरज चव्हाण यांचा राजीनामा घेण्याचा निर्णय योग्य होता, पण महिन्याभरातच त्यांचं प्रमोशन? अजितदादांच्या पक्षात दोन गट असून, एक गट त्यांची प्रतिमा खराब करण्याचा प्रयत्न करत आहे.” त्यांनी या नियुक्तीला ‘विनाशकाले विपरीत बुद्धी’ असं संबोधलं. सुनील तटकरे यांचं स्पष्टीकरण सूरज चव्हाण यांच्या नियुक्तीवर सुनील तटकरे यांनी स्पष्टीकरण देताना सांगितलं, “मारहाणीच्या घटनेचा निषेध मी तेव्हाच व्यक्त केला होता. पक्षाने सूरज चव्हाण यांचा युवक प्रदेशाध्यक्षपदाचा राजीनामा घेतला होता. मात्र, गेल्या अनेक वर्षांपासून चव्हाण पक्षासाठी काम करत आहेत. त्यामुळे कोअर कमिटीने विचारपूर्वक हा निर्णय घेतला.” तटकरे यांनी या नियुक्तीला पक्षाच्या अंतर्गत निर्णयाचं समर्थन केलं आहे.
