मंचर : बारा ज्योतिर्लिंगांपैकी एक असलेल्या श्री क्षेत्र भीमाशंकर मंदिराचे दरवाजे तब्बल पाच महिन्यांनंतर १५ जून २०२६ पासून भाविकांसाठी खुले होणार असल्याची घोषणा प्रशासनाने केली आहे. मात्र मंदिरात दर्शनासाठी ऑनलाईन नोंदणी अनिवार्य करण्यात आली असताना त्यासाठीचे संकेतस्थळ अद्याप कार्यान्वित झाले नसल्याने हजारो भाविकांमध्ये संभ्रमाचे वातावरण निर्माण झाले आहे. मंदिर खुले होण्यास अवघे काही दिवस शिल्लक असताना नोंदणीची प्रक्रिया सुरू न झाल्याने भाविकांकडून नाराजी व्यक्त होत आहे.

जिल्हाधिकारी कार्यालयाने जाहीर केलेल्या नियोजनानुसार १५ जून ते ३० जून या कालावधीत केवळ ऑनलाईन नोंदणी केलेल्या भाविकांनाच दर्शनाची परवानगी देण्यात येणार आहे. दररोज सकाळी ७ ते ११ या वेळेतच दर्शन व्यवस्था सुरू राहणार असून एका दिवसात केवळ एक हजार भाविकांना प्रवेश दिला जाणार आहे. दर्शनासाठी येणाऱ्या प्रत्येक भाविकाने वैध ओळखपत्र सोबत बाळगणे बंधनकारक राहणार आहे.

सिंहस्थ कुंभमेळ्याच्या पार्श्वभूमीवर मंदिर परिसरात विविध विकासकामे सुरू आहेत. सभामंडप, दर्शनबारी, पायरी मार्ग, प्रवेशद्वार तसेच भाविकांसाठीच्या सुविधा अधिक सक्षम करण्याचे काम अंतिम टप्प्यात पोहोचले आहे. त्यामुळे सकाळी ११ नंतर विकासकामांसाठी मंदिर परिसर बंद ठेवण्याचा निर्णय प्रशासनाने घेतला आहे. त्यामुळे भाविकांना मर्यादित वेळेत आणि नियोजित संख्येतच दर्शन घेता येणार आहे.

दरम्यान, मंदिर प्रशासनाने ५ जूनपासून ऑनलाईन नोंदणी सुरू होणार असल्याचे यापूर्वी जाहीर केले होते. मात्र ९ जूनपर्यंत अनेक भाविकांनी संकेतस्थळावर जाऊन नोंदणी करण्याचा प्रयत्न केला असता तेथे “Coming Soon” असा संदेश दिसून येत आहे. त्यामुळे प्रत्यक्ष नोंदणी प्रक्रिया सुरू झाली नसल्याचे स्पष्ट झाले आहे. दर्शनासाठी केवळ ऑनलाईन नोंदणी केलेल्या भाविकांनाच प्रवेश दिला जाणार असल्याने अनेकांनी प्रवासाचे नियोजन, निवास व्यवस्था आणि दर्शनाचे वेळापत्रक ठरविणे सध्या थांबवले आहे.

राज्याच्या विविध भागांतून तसेच परराज्यांतून दरवर्षी लाखो भाविक भीमाशंकर येथे दर्शनासाठी येत असतात. मंदिर पुन्हा खुले होत असल्याची घोषणा झाल्यानंतर अनेकांनी दर्शनासाठी तयारी सुरू केली आहे. मात्र नोंदणीची सुविधा उपलब्ध नसल्याने भाविकांमध्ये संभ्रम आणि नाराजी वाढत आहे. मंदिर खुले होण्यापूर्वीच संकेतस्थळ सुरू करून नोंदणी प्रक्रिया पारदर्शक आणि सुरळीत राबवावी, अशी मागणी भाविकांकडून होत आहे.

भाविकांचे म्हणणे आहे की, मंदिर खुले करण्याचा निर्णय स्वागतार्ह असला तरी दर्शनासाठी आवश्यक असलेली ऑनलाईन व्यवस्था वेळेत सुरू होणे तितकेच महत्त्वाचे आहे. अन्यथा दूरवरून येणाऱ्या भाविकांची गैरसोय होण्याची शक्यता आहे. प्रशासनाने याबाबत तातडीने भूमिका स्पष्ट करून नोंदणी प्रक्रिया सुरू करावी, अशी अपेक्षा व्यक्त होत आहे.

दर्शनासाठी महत्त्वाचे नियम

• १५ जून ते ३० जून या कालावधीत दर्शन व्यवस्था
• सकाळी ७ ते ११ या वेळेतच दर्शन
• दररोज १,००० भाविकांना प्रवेश
• ऑनलाईन नोंदणी अनिवार्य
• वैध ओळखपत्र बंधनकारक
• सकाळी ११ नंतर विकासकामांमुळे मंदिर परिसर बंद

भाविकांचा सवाल

“दर्शनासाठी ऑनलाईन नोंदणी अनिवार्य आहे, मात्र संकेतस्थळच सुरू नसल्याने नोंदणी कशी करायची? मंदिर खुले होण्यास काहीच दिवस शिल्लक असताना प्रशासनाने तातडीने स्पष्टता द्यावी,” अशी मागणी भाविकांकडून करण्यात येत आहे.

हेही वाचा : Malavali : ग्रामपंचायतीच्या आश्वासनानंतर आंदोलन मागे; मळवलीतील प्रलंबित प्रश्नांसाठी उपोषण