राजगुरूनगर : खेड तालुक्यात झालेल्या जोरदार पावसामुळे जमिनीत पुरेसा ओलावा निर्माण झाला असून, सध्या शेतीसाठी सिंचनाच्या पाण्याची तातडीची गरज कमी आहे. त्यामुळे चासकमान धरणातून 5 नोव्हेंबरला प्रस्तावित असलेले सिंचन आवर्तन पुढे ढकलून ते 20 नोव्हेंबरनंतर सोडावे, अशी मागणी आमदार बाबाजी काळे यांनी जलसंपदामंत्री राधाकृष्ण विखे-पाटील यांच्याकडे केली आहे. या मागणीला मंत्र्यांनी सकारात्मक प्रतिसाद दिल्याने आवर्तन पुढे ढकलले जाण्याची शक्यता निर्माण झाली आहे.

पुणे येथे 29 ऑक्टोबरला झालेल्या कालवा सल्लागार समितीच्या बैठकीत चासकमान धरणातून 5 नोव्हेंबरपासून टेल-टू-हेड पद्धतीने पहिले सिंचन आवर्तन सोडण्याचे नियोजन करण्यात आले होते. मात्र, त्यानंतर खेड तालुक्यातील अनेक भागांत जोरदार पाऊस झाल्याने जमिनीत ओलावा टिकून आहे. त्यामुळे सध्या सिंचनाच्या पाण्याची तातडीची आवश्यकता नसल्याने आवर्तन पुढे ढकलण्याची मागणी शेतकर्‍यांनी आमदार काळे यांच्याकडे केली होती.

या मागणीची दखल घेत काळे यांनी जलसंपदामंत्र्यांकडे आवर्तन पुढे ढकलण्याचा मुद्दा मांडला. सध्याच्या परिस्थितीत चासकमान तसेच भामा आसखेड धरणातून पाणी सोडल्यास उपलब्ध जलसाठ्याचा विनाकारण वापर होऊ शकतो. रब्बी हंगामात पिकांना पाण्याची गरज भासल्यास शेतकर्‍यांची गैरसोय टाळण्यासाठी धरणातील पाण्याचे योग्य नियोजन आवश्यक असल्याचे त्यांनी निदर्शनास आणून दिले. सध्याचा पाऊस, जमिनीतील ओलावा आणि धरणांतील उपलब्ध पाणीसाठा विचारात घेऊन 5 नोव्हेंबरचे आवर्तन पुढे ढकलावे आणि 20 नोव्हेंबरनंतर परिस्थितीनुसार पाणी सोडावे, अशी भूमिका काळे यांनी मांडली. त्याला जलसंपदामंत्री विखे-पाटील यांनी सकारात्मक प्रतिसाद दिला आहे.

दरम्यान, आवर्तन पुढे ढकलण्याबाबत जलसंपदा विभागाकडून हालचाली सुरू झाल्या आहेत. मात्र, याबाबतचा अंतिम निर्णय अद्याप झालेला नसल्याने तालुक्यातील शेतकर्‍यांचे लक्ष विभागाच्या निर्णयाकडे लागले आहे.