Food Price Hike- व्यावसायिक गॅस सिलिंडरचा तुटवडा दूर झाला आहे. पुरवठाही पूर्ववत झाला आहे. मात्र, हॉटेल आणि खाणावळीतील खाद्यपदार्थांचे वाढलेले दर अद्याप कमी झालेले नाहीत. गॅसच्या तुटवड्याच्या काळात वाढलेले दर कायम आहेत. त्यामुळे पिंपरी-चिंचवडमधील कामगार, नोकरदार आणि विद्यार्थ्यांच्या रोजच्या खर्चात वाढ झाली आहे. पिंपरी-चिंचवड हे औद्योगिक शहर आहे. शहरात मोठ्या संख्येने कामगार आणि नोकरदार आहेत.

भोसरी, तळवडे, चाकण परिसरातील औद्योगिक पट्टा मोठा आहे. हिंजवडी आयटी पार्कमध्येही शहरातून मोठ्या संख्येने नागरिक ये-जा करतात. आकुर्डी, पिंपरी आणि चिंचवड परिसरात विद्यार्थी मोठ्या संख्येने राहतात. यातील अनेकजण जेवणासाठी हॉटेल, मेस आणि खाणावळीवर अवलंबून आहेत. त्यामुळे खाद्यपदार्थांच्या दरवाढीचा थेट परिणाम त्यांच्या दैनंदिन खर्चावर होत आहे.

काही दिवसांपूर्वी ७० ते ८० रुपयांना मिळणारी साधी शाकाहारी थाळी आता ९० ते १०० रुपयांवर पोहोचली आहे. काही ठिकाणी भाजी, भात किंवा अन्य पदार्थासाठी स्वतंत्र पैसे आकारले जात आहेत. त्यामुळे एका वेळच्या जेवणाचा खर्च वाढला आहे. वडापावच्या दरातही वाढ झाली आहे. पूर्वी १५ रुपयांना मिळणारा वडापाव आता २० रुपयांना मिळत आहे. समोसा, भजी, पोहे आणि मिसळच्या दरातही वाढ झाली आहे. नाश्त्यासाठी दररोज खर्च होणारी रक्कम वाढली आहे.

गॅसपेक्षा इतर खर्च वाढल्याचा दावा
गॅसचा पुरवठा सुरळीत झाला असला तरी खाद्यपदार्थांचे दर कमी करण्यास हॉटेल व्यावसायिक तयार नसल्याचे दिसून येते. खाद्यतेल, डाळी, भाज्या आणि मसाल्यांचे दर वाढल्याचे व्यावसायिकांचे म्हणणे आहे. दुकानांचे भाडे, वीज बिल आणि कामगारांची मजुरीही वाढली आहे. त्यामुळे केवळ गॅसचा पुरवठा सुरळीत झाल्याने खाद्यपदार्थांचे दर कमी करता येणार नसल्याचे हॉटेल व्यावसायिक सांगत आहेत.

ग्राहकांकडून दर कमी करण्याची अपेक्षा
गॅसच्या तुटवड्यामुळे दर वाढविण्यात आले होते. आता पुरवठा सुरळीत झाला आहे. त्यामुळे दर पूर्वीच्या पातळीवर आणावेत, अशी ग्राहकांची अपेक्षा आहे. विशेषतः रोज हॉटेलमध्ये जेवणाऱ्या कामगार आणि विद्यार्थ्यांना दरवाढीचा मोठा फटका बसत आहे. दररोजच्या नाश्त्याला आणि जेवणाला अतिरिक्त पैसे मोजावे लागत आहेत. महिन्याच्या बजेटमध्ये त्यासाठी स्वतंत्र तरतूद करावी लागत आहे. त्यामुळे वाढलेले दर कमी करण्याची मागणी होत आहे.

“गॅसचा प्रश्न सुटला, पण इतर खर्च वाढले”
“व्यावसायिक सिलिंडरचा पुरवठा आता सुरळीत आहे. मात्र, खाद्यतेल, भाजीपाला आणि इतर कच्च्या मालाचे दर वाढले आहेत. दुकानाचे भाडे आणि कामगारांची मजुरीही वाढली आहे. त्यामुळे सध्याचे दर कमी करणे व्यावसायिकांसाठी कठीण आहे,” असे एका स्थानिक हॉटेल व्यावसायिकाने सांगितले.