Keshav Upadhyay On Manoj Jarange Patil : मराठा आरक्षण आंदोलन पुन्हा जोर धरू लागले आहे. मराठा आरक्षणासाठी आंदोलन करणारे नेते मनोज जारंगे यांनी 27 ऑगस्टपासून मुंबईच्या दिशेने मोर्चा काढण्याची घोषणा केली आहे. मात्र, गणेशोत्सवाच्या पार्श्वभूमीवर हे आंदोलन कायद्य आणि सुव्यवस्थेच्या दृष्टीने मोठे आव्हान ठरू शकते.

याच पार्श्वभूमीवर भाजपचे महाराष्ट्राचे मुख्य प्रवक्ते केशव उपाध्ये यांनी एक्सवर (पूर्वीचे ट्विटर) पोस्ट करत जारंगे पाटलांना मुंबईतील मोर्चा पुढे ढकलण्याची विनंती केली आहे. उपाध्ये यांनी गणेशोत्सवाच्या आनंदात व्यत्यय आणू नये आणि सहकार्याने मराठा समाजाच्या समस्या सोडवाव्यात, असे आवाहन केले आहे.

गणेशोत्सव हा महाराष्ट्राचा राज्य महोत्सव आहे आणि मुंबईत लाखो भक्तांचा ओघ असतो. 27 ऑगस्टपासून सुरू होणाऱ्या या उत्सवात पोलिसांना कायद्य आणि सुव्यवस्था राखण्यासाठी आधीच मोठा ताण असतो. जारंगे पाटलांच्या मुंबई मोर्च्यामुळे शहरातील वाहतूक कोंडी, गर्दी आणि संभाव्य गोंधळ वाढू शकतो.

मुंबई पोलिसांनीही या आंदोलनासाठी विशेष सुरक्षा व्यवस्था केली आहे. यामध्ये 15,000 हून अधिक पोलिस, सीआरपीएफची मदत आणि क्राउड कंट्रोल उपाययोजना समाविष्ट आहेत. विशेषतः लालबागचा राजा सारख्या प्रसिद्ध मंडळांना भेट देण्याच्या जरांगे यांच्या योजनांमुळे पोलिसांना ‘नाइटमेअर’ सारखी परिस्थिती भासू शकते, अशी चिंता व्यक्त केली जात आहे.

केशव उपाध्ये काय म्हणाले?

केशव उपाध्ये यांनी एक्सवर पोस्ट करत म्हटले आहे, “उभ्या महाराष्ट्राचे आराध्य दैवत असलेल्या श्रीगणेशाचे आगमन उद्या होत आहे. महाराष्ट्रातील घराघरात हा गणेशोत्सव उत्साहात साजरा केला जातो. मराठा समाज हा उत्सव मोठ्या भाविकतेने साजरा करतो. नेमक्या अशाच वेळी आरक्षणाचे आंदोलन उभे करून जारंगे मोर्चाने मुंबईत येत आहेत.

अवघ्या मुंबईच्या जनजीवनाची घडी विस्कळीत होऊ नये, यासाठी त्यांनी मुंबईतील मोर्चा पुढे ढकलावा, हीच त्यांना विनंती आहे.” उपाध्ये यांनी पुढे सांगितले की, गणेशोत्सवाच्या काळात संपूर्ण सुरक्षा व्यवस्था डोळ्यात तेल घालून काळजी घेत असते. ही व्यवस्था विस्कळीत होऊ नये, यासाठी सगळ्यांचे सहकार्य आवश्यक आहे.

उपाध्ये यांनी मराठा समाजाच्या आरक्षणाबाबतही स्पष्टपणे सांगितले की, देवेंद्र फडणवीस सरकार मराठा समाजाला आरक्षण देण्यासाठी कटिबद्ध आहे. “सरकार मराठा समाजाच्या मागण्यांसाठी प्रामाणिक आणि सकारात्मक आहे. देवेंद्र फडणवीस मुख्यमंत्री असताना मराठा आरक्षणाचा श्रीगणेशा केला होता.

उद्धव ठाकरे–शरद पवारांच्या सरकारमुळे आरक्षण गमावले गेले, पण आता फडणवीस अडचणी दूर करीत आहेत.” मराठा समाजातील तरुणांसाठी अनेक योजना सुरू झाल्या असून, सहकार्याचा हात पुढे केला तर समाजाचे प्रश्न सोडवता येतील आणि सामाजिक सौहार्द वाढेल, असा विश्वास उपाध्ये यांनी व्यक्त केला.

आंदोलनाचा अधिकार, पण सणात व्यत्यय नको : देवेंद्र फडणवीस

मुख्यमंत्री देवेंद्र फडणवीस यांनीही जारंगे पाटलांच्या आंदोलनावर भाष्य केले आहे. “लोकशाहीमध्ये आंदोलन करण्याचा सगळ्यांना अधिकार आहे. सरकार कुणाला रोखणार नाही. मात्र, गणेशोत्सव हा हिंदूंचा सण आहे. त्यात कुणी विघ्न आणू नये. आम्हाला विश्वास आहे की आंदोलक या सणाच्या आनंदात खोडा घालणार नाहीत. कारण आम्ही सगळे छत्रपती शिवाजी महाराजांचे मावळे आहोत,” असे फडणवीस म्हणाले. फडणवीस यांनी मराठा समाजासाठी 10% आरक्षण, हॉस्टेल्स, उद्योजकतेसाठी आर्थिक मदत यांसारख्या उपाययोजना केल्याचे सांगितले. “सरकारने मराठ्यांसाठी 1.5 लाख उद्योजक तयार केले आहेत,” असेही त्यांनी नमूद केले.

मनोज जारंगे यांच्या मुख्य मागण्या

– मराठा-कुणबी एकच असल्याचा जीआर मंजूर करा.
– हैदराबाद गॅझेटसह 58 लाख नोंदींची तात्काळ अंमलबजावणी.
– 2012 च्या कायद्यात दुरुस्ती आणि ओबीसी अंतर्गत आरक्षण.

मोर्च्याचा मार्ग आणि वेळापत्रक

27 ऑगस्ट: सकाळी 10 वाजता अंतरवाली सराटी येथून प्रस्थान. मार्ग: अंतरवाली – पैठण – शेवगाव (अहिल्यानगर) – कल्याण फाटा – आळे फाटा – शिवनेरी (जुन्नर मुक्काम).
28 ऑगस्ट: शिवनेरीहून खेड मार्गे चाकण, लोणावळा, वाशी, चेंबूर. रात्री आझाद मैदानावर पोहोच.
29 ऑगस्ट: सकाळी 10 वाजता आझाद मैदानावर आंदोलन आणि बेमुदत उपोषण सुरू.