Fire Accident Neera – पुरंदर तालुक्यातील नीरा शहराच्या मुख्य बाजारपेठेतील लक्ष्मी रोडवरील गौरी शू पॅलेस या चप्पल दुकानाच्या वरच्या मजल्यावरील गोडाऊनला रविवारी (दि.२७) रोजी सकाळी भीषण आग लागून चप्पल, पुठ्ठे, साहित्य खाक झाले. आगीने काही क्षणांतच रौद्ररूप धारण केल्याने आगीचे मोठे लोळ, धुराचे लोट परिसरात पसरले. मात्र, ज्युबिलंटच्या अग्निशमन दलाने शर्थीचे प्रयत्न केल्याने आग आटोक्यात आणली.

सुदैवाने जीवितहानी टळली असून लाखो रुपयांचे नुकसान झाले आहे. दरम्यान, आगीच्या तांडवाने बाजारपेठेत एकच खळबळ उडाली होती. रविवारी (दि.२७) सकाळी दहाच्या सुमारास गौरी शू पॅलेसच्यावरच्या मजल्यावरील गोडाऊनमधून मोठ्या प्रमाणात धूर बाहेर येत असल्याचे नागरिकांच्या निदर्शनास आले. काही वेळातच गोडाऊनमध्ये आग लागल्याचे स्पष्ट झाले. परिसरातील युवकांनी तत्काळ आग विझविण्याचा प्रयत्न केला.

मात्र, गोडाऊनमध्ये चप्पल, पुठ्ठे आणि अन्य ज्वलनशील साहित्य मोठ्या प्रमाणावर असल्याने आग वेगाने पसरली. आगीच्या ज्वाळा आणि धुराचे लोट वाढू लागल्याने परिसरात भीतीचे वातावरण निर्माण झाले. शेजारील दुकानदारांनी खबरदारी म्हणून दुकाने बंद करून सुरक्षित ठिकाणी धाव घेतली, तर रहिवाशांमध्येही घबराट पसरली होती. घटनेची माहिती मिळताच प्रभारी पोलीस पाटील राहुल शिंदे यांनी तातडीने ज्युबिलंट इनग्रेव्हीया कंपनीच्या अग्निशमन विभागाशी संपर्क साधून मदतीची विनंती केली.

नीरा पोलीस दूरक्षेत्राला घटनेची माहिती देत बाजारपेठेतील वाहतूक सुरळीत करण्यासाठी खबरदारी घेण्यात आली. दरम्यान, महावितरण कंपनीकडून खबरदारी म्हणून परिसरातील वीजपुरवठा खंडित केला. माहिती मिळताच ज्युबिलंटचे फायर युनिट तत्काळ घटनास्थळी दाखल झाले. अग्निशमन कर्मचाऱ्यांनी परिस्थितीचा आढावा घेत विविध बाजूंनी पाण्याचा मारा सुरू केला.

आगीचे कारण अस्पष्ट
आगीचे नेमके कारण अद्याप स्पष्ट झाले नसून, आगीमुळे जवळपास १५ लाखांचे नुकसान झाल्याची माहिती व्यापारी संपत मोठे यांनी दिली आहे. ज्युबिलंटच्या अग्निशमन दलाने वेळीच केलेल्या प्रभावी कारवाईमुळे मोठी आग शेजारील दुकाने आणि इमारतींपर्यंत पोहोचण्यापासून रोखण्यात आले.