Fake Number Plate – फायनान्स कंपनीच्या जप्तीपासून वाचण्यासाठी एका तरुणाने केलेली ‘हुशारी’ अखेर त्याच्याच अंगाशी आली. कर्जावर घेतलेल्या दुचाकीचे हप्ते न भरल्याने फायनान्स कंपनीकडून फोनची मालिकाच सुरू होती. गाडी जप्त होऊ नये म्हणून संबंधित तरुणाने मित्राच्या दुचाकीचा नंबर आपल्या गाडीवर लावण्याची युक्ती केली. काही दिवस हा कारभार सुरळीत सुरू होता; मात्र चुकीच्या ठिकाणी पार्किंग केल्याने पोलिसांनी गाडी उचलून नेली आणि बनावट नंबर प्लेटचा भांडाफोड झाला. वाल्हेकरवाडी येथील एका महिलेच्या नावावर असलेल्या दुचाकीचा क्रमांक वापरून ही युक्ती रचण्यात आली होती. बुधवारी पहाटे संबंधित महिलेच्या मोबाइलवर पोलिसांचा फोन आला – “तुमची गाडी चुकीच्या ठिकाणी पार्क केली आहे, कारवाई होईल,” असा इशारा देण्यात आला. प्रत्यक्षात तिची गाडी घराजवळच उभी असल्याने त्या कुटुंबाला धक्का बसला. पोलिसांनी पाठवलेल्या छायाचित्रात मात्र त्याच क्रमांकाची, त्याच कंपनीची, त्याच रंगाची दुसरीच दुचाकी दिसत होती. गाडी मालक येत नसल्याने पोलिसांनी संबंधित वाहन वाहतूक पोलिसांच्या शिवाजीनगर वाहतूक शाखेत जमा केले. महिलेच्या पतीने चौकीत जाऊन पाहणी केली असता, त्यांच्या गाडीप्रमाणेच रंग आणि क्रमांक असलेली दुचाकी उभी असल्याचे दिसले. दरम्यान, गावाकडील परिचित व्यक्तीचा फोन त्या महिलेचा पतीला आला. “मीच तुमच्या दुचाकीचा नंबर वापरला, आहे. तुमच्या परवानगीने हा क्रमांक वापरल्याचे तुम्ही पोलिसांना सांगा,” अशी विनंती करण्यात आली. मात्र नंबर प्लेटचा गैरवापर झाल्याने तक्रार देण्याचा इशारा त्या महिलेच्या पतीने दिला.फायनान्स कंपनीच्या कारवाईपासून वाचण्यासाठी बनावट नंबर प्लेटचा आधार घेतलेल्या तरुणाची युक्ती काही दिवस यशस्वी ठरली; पण वाहतूक नियमभंगामुळे पोलिसांच्या नजरेत येताच सगळा खेळ उघड झाला. एचएसआरपी बनावट नंबरप्लेट कुठे बनते? दरम्यान, एचएसआरपी नंबर प्लेट अधिकृत परवानाधारक कंपनीमार्फतच तयार केली जाते. त्यासाठी आरसी बुक व आवश्यक कागदपत्रांची पडताळणी बंधनकारक असते. तरीही बनावट प्लेट कशी तयार झाली, हा प्रश्न उपस्थित झाला आहे. आता या प्रकरणात नंबर प्लेट तयार करणाऱ्या व्यक्तीपर्यंत पोलीस तपास पोहोचतो का, याकडे सर्वांचे लक्ष लागले आहे.
