पुणे : झटपट श्रीमंत होण्याच्या हव्यासापोटी बाटलीबंद पाण्याचा व्यवसाय करणारा तरुण आणि बी.कॉम.च्या दुसऱ्या वर्षात शिकणारा त्याचा नातेवाईक चक्क दरोडेखोर बनला. मार्केटयार्डमधील एका इमारतीखाली बसून गप्पा मारत असताना दोन ज्येष्ठ नागरिकांच्या संभाषणातून त्यांना हवाल्याच्या व्यवहाराची माहिती मिळाली.

याच माहितीचा गैरफायदा घेत त्यांनी पाच लाख रुपयांची रोकड लुटण्याचा पहिला प्रयत्न केला. त्यानंतर साथीदारांच्या मदतीने मार्केटयार्ड परिसरात भरदिवसा ३० लाख रुपयांच्या रोकड असलेल्या बॅगेवर डल्ला मारला.

या पैशांतून मैत्रिणीला दीड लाखांचा आयफोन, स्वतःसाठी कार आणि बुलेट खरेदी करण्याबरोबरच गोव्यात जाऊन अडीच लाखांची उधळपट्टी केली. अखेर स्वारगेट पोलिसांनी या टोळीचा पर्दाफाश केला आहे.

यश प्रवीण सोनवणे (वय २४, रा. मांजरी) आणि निहाल नवनाथ अडागळे (वय १९, रा. मुंढवा) अशी अटक केलेल्या आरोपींची नावे आहेत. या दोघांसह त्यांच्या अन्य साथीदारांनाही पोलिसांनी अटक केली आहे. त्यांच्याकडून सुमारे २४ लाख रुपयांचा मुद्देमाल जप्त करण्यात आला आहे. पोलीस उपायुक्त मिलिंद मोहिते यांनी ही माहिती दिली.

ज्येष्ठांच्या गप्पांतून मिळाली दरोड्याची कल्पना
पोलिसांनी दिलेल्या माहितीनुसार, यश सोनवणे याचा बाटलीबंद पाण्याच्या विक्रीचा व्यवसाय आहे, तर निहाल अडागळे हा बी.कॉम.च्या दुसऱ्या वर्षात शिकत आहे. दोघे नातेवाईक असून, एकदा ते मार्केटयार्ड परिसरातील एका इमारतीखाली गप्पा मारत बसले होते. त्याचवेळी त्यांच्या मागे दोन ज्येष्ठ नागरिकही चर्चा करत होते.

संबंधित इमारतीत हवाल्याचा व्यवसाय चालत असल्याचे आणि या व्यवहारांमध्ये अधिकृत नोंदी तसेच सुरक्षेची पुरेशी काळजी घेतली जात नसल्याचे त्यांच्या बोलण्यातून समोर आले.

ज्येष्ठ नागरिकांचे हे संभाषण यशच्या कानावर पडले. त्यातून त्याला झटपट पैसे कमावण्याची कल्पना सुचली. त्याने निहालला हवाल्याच्या पैशांची बॅग लुटण्याचा कट सांगितला. या कटात कोल्हापूर येथील एका धडधाकट मित्रालाही सहभागी करून घेण्याचे ठरले.

पहिल्या प्रयत्नात पाच लाखांवर डल्ला
त्यानुसार, २३ सप्टेंबर रोजी आरोपींनी हवाल्याच्या कार्यालयाबाहेर पाळत ठेवली. तेथून पाच लाख रुपयांची रोकड घेऊन निघालेल्या कर्मचाऱ्यांचा त्यांनी पाठलाग केला. सॅलिसबरी पार्क परिसरात त्यांना गाठून धारदार लोखंडी शस्त्राने हल्ला केला. या हल्ल्यात कर्मचारी जखमी झाला. मात्र, पैशांची बॅग हिसकावण्याचा त्यांचा प्रयत्न फसला. याप्रकरणी स्वारगेट पोलीस ठाण्यात गुन्हा दाखल करण्यात आला होता.

पहिला प्रयत्न अयशस्वी ठरला असला, तरी आरोपींचा पैशांचा हव्यास कमी झाला नाही. त्यानंतर त्यांनी आणखी मोठा डाव आखला. ७ ऑक्टोबर रोजी दुपारी सव्वाएकच्या सुमारास मार्केटयार्ड रस्त्यावर एका व्यापाऱ्याची ३० लाख रुपये असलेली बॅग लुटली.

या घटनेनंतर मार्केटयार्ड पोलीस ठाण्यात बॅग हरवल्याची नोंद करण्यात आली होती. या प्रकरणात दरोड्याचा गुन्हा दाखल न केल्याच्या कारणावरून संबंधित वरिष्ठ पोलीस निरीक्षकाला नुकतेच निलंबित करण्यात आले आहे.

३०० ते ३५० सीसीटीव्ही फुटेज तपासून आरोपींचा माग
दोन्ही घटनांचा तपास करताना स्वारगेट पोलिसांनी मार्केटयार्ड, बिबवेवाडी, वानवडी, कोंढवा, हडपसर, मगरपट्टा सिटी, केशवनगर आणि मुंढवा परिसरातील सुमारे ३०० ते ३५० सीसीटीव्ही कॅमेऱ्यांचे चित्रीकरण तपासले. महिनाभर तांत्रिक विश्लेषण आणि गोपनीय माहितीच्या आधारे पोलिसांनी मुंढवे येथून एका संशयिताला ताब्यात घेतले. त्याची चौकशी केल्यानंतर यश आणि निहालसह अन्य साथीदारांचा सहभाग उघड झाला.

मैत्रिणीला आयफोन, स्वतःला कार-बुलेट; गोव्यात उधळले पैसे!
लुटलेल्या पैशांचा आरोपींनी मनसोक्त वापर केला. यशने आपल्या मैत्रिणीसाठी तब्बल दीड लाख रुपयांचा आयफोन खरेदी केला. स्वतःसाठी सहा लाख रुपयांची सेकंडहँड चारचाकी घेतली, तर निहालने बुलेट दुचाकी खरेदी केली. यशने आईलाही तीन लाख रुपये दिले. उर्वरित पैशांतून सोन्या-चांदीचे दागिने आणि महागड्या वस्तू खरेदी करण्यात आल्या.

एवढ्यावरच न थांबता दोघांनी विमानाने गोव्याला जाण्याचा बेत आखला. तेथे तारांकित हॉटेलमध्ये मुक्काम करून मौजमजा केली. या सहलीत त्यांनी तब्बल अडीच लाख रुपये खर्च केले. गुन्ह्यातून मिळालेल्या पैशांवर ऐशोआरामाचे आयुष्य जगण्याचे त्यांचे स्वप्न मात्र पोलिसांच्या कारवाईमुळे धुळीस मिळाले.

२४ लाखांचा मुद्देमाल जप्त
पोलिसांनी आरोपींकडून गुन्ह्यात वापरलेली वाहने, कपडे आणि मोबाईल जप्त केले आहेत. तसेच लुटीच्या पैशांतून खरेदी केलेली आय-२० कार, बुलेट दुचाकी, मोबाईल, साडेचार तोळे सोन्याचे दागिने, चांदीचे तोडे, घड्याळे आणि सहा लाख ५० हजार रुपयांची रोकड हस्तगत केली आहे.

जप्त मुद्देमालाची एकूण किंमत सुमारे २४ लाख रुपये आहे. वरिष्ठ पोलीस निरीक्षक यशवंत निकम यांच्या मार्गदर्शनाखाली सहाय्यक पोलीस निरीक्षक स्वप्निल शेळके, उपनिरीक्षक बाळू शिरसट आणि त्यांच्या पथकाने ही कामगिरी केली.

Ladki Bahin Yojana: दिवाळापूर्वी लाडक्या बहिणींना सरप्राइज! सप्टेंबरचे 1500 रुपये खात्यात जमा…