Elevated Corridor – पुणे परिसरातील वाढती वाहतूक कोंडी कमी करून दळणवळण अधिक गतिमान करण्याच्या दृष्टीने महाराष्ट्र राज्य पायाभूत सुविधा विकास महामंडळाच्या (एमएसआयडीसी) माध्यमातून राबविण्यात येणार्‍या तीन महत्त्वाकांक्षी रस्ते प्रकल्पांचे भूमिपूजन शनिवारी मुख्यमंत्री देवेंद्र फडणवीस आणि केंद्रीय रस्ते वाहतूक व महामार्ग मंत्री नितीन गडकरी यांच्या हस्ते होणार आहे. या कार्यक्रमात हडपसर-यवत उन्नत मार्ग, पुणे-शिरूर द्रुतगती महामार्ग आणि तळेगाव-चाकण-शिक्रापूर उन्नत महामार्ग या तीन महत्त्वाच्या प्रकल्पांचा शुभारंभ होणार असून,

हे प्रकल्प पुढील चार वर्षांत पूर्ण करण्याचे नियोजन करण्यात आले आहे. हडपसर-यवत उन्नत मार्ग हा पूर्व पुण्याचा चेहरामोहरा बदलणारा प्रकल्प ठरणार असल्याचे मानले जात आहे. पुणे-सोलापूर राष्ट्रीय महामार्गावरील हडपसर, शेवाळेवाडी, मांजरी, लोणी काळभोर, उरुळी कांचन आणि यवत परिसरात वाढलेले नागरीकरण, औद्योगिक विस्तार आणि वाहनांची वाढती संख्या यामुळे सातत्याने वाहतूक कोंडी निर्माण होत आहे.

प्रस्तावित उन्नत मार्गामुळे या समस्येवर मोठ्या प्रमाणात उपाय होण्याची अपेक्षा आहे. हा प्रकल्प मेट्रो प्रशासनाच्या समन्वयातून राबविण्यात येणार असून, भविष्यात एकाच संरचनेवर मेट्रो मार्गिका आणि उन्नत महामार्ग उभारण्याची संकल्पना विचाराधीन आहे. या प्रकल्पामुळे उरुळी कांचन, यवत, जेजुरी तसेच परिसरातील औद्योगिक क्षेत्रांना मोठा फायदा होणार आहे. कच्चा माल, तयार उत्पादने आणि मालवाहतूक अधिक वेगाने होईल.

पुणे-सोलापूर मार्गावरील वाहतूक सुरळीत झाल्याने उद्योग, व्यापार आणि लॉजिस्टिक क्षेत्राला नवी गती मिळेल. वाहतूक सुलभ झाल्यामुळे मांजरी, शेवाळेवाडी, कदमवाकवस्ती, लोणी काळभोर आणि उरुळी कांचन परिसरातील निवासी तसेच व्यावसायिक मालमत्तांना मागणी वाढण्याची शक्यता व्यक्त केली जात आहे. स्थानिक बाजारपेठा, हॉटेल व्यवसाय आणि इतर पूरक उद्योगांनाही याचा लाभ होईल. उन्नत मार्गाच्या उभारणीसाठी पुढील चार वर्षे मोठ्या प्रमाणावर पिलर उभारणीचे काम सुरू राहणार आहे.

प्रवासाचा वेळ निम्म्याहून कमी होणार
उन्नत मार्गामुळे हडपसर, 15 नंबर, शेवाळेवाडी, कवडीपाट टोलनाका, लोणी स्टेशन, लोणी काळभोर, कुंजीरवाडी, उरुळी कांचन आणि यवत परिसरातील वाहतूक कोंडी मोठ्या प्रमाणात कमी होण्याची अपेक्षा आहे. स्थानिक वाहतूक सेवा रस्त्यांवरून, तर लांब पल्ल्याची वाहतूक उन्नत मार्गावरून होणार असल्याने सध्या हडपसर ते यवत हे अंतर पार करण्यासाठी लागणारा एक ते दीड तासांचा कालावधी कमी होऊन अवघ्या अर्ध्या तासात प्रवास पूर्ण होऊ शकणार आहे. यामुळे वेळेबरोबरच इंधनाचीही मोठी बचत होणार आहे.

एकाच खांबावर धावणार मेट्रो आणि उन्नत महामार्ग
हडपसर-यवत उन्नत मार्ग हा महाराष्ट्र राज्य पायाभूत सुविधा विकास महामंडळ आणि मेट्रो प्रशासन यांच्या संयुक्त समन्वयातून साकारला जाणार आहे. भविष्यातील वाहतूक गरजा लक्षात घेऊन एकाच पिलरवर खालच्या स्तरावर स्थानिक रस्ता, त्यावर उन्नत महामार्ग आणि सर्वात वर मेट्रो मार्गिका अशी आधुनिक बहुस्तरीय रचना उभारण्याचा विचार सुरू आहे. या संकल्पनेमुळे भूसंपादनाचा खर्च कमी होण्याबरोबरच पूर्व पुण्यासाठी आधुनिक सार्वजनिक वाहतुकीचा सक्षम पर्याय उपलब्ध होणार आहे.