Maharashtra Epstein Files : राजकारणाच्या अंधाऱ्या कोपऱ्यांत दडलेली रहस्यं, सत्तेच्या जोरावर सत्य दडपण्याचे प्रयत्न आणि गुन्हेगारी विश्वाशी जोडले जाणारे धागेदोरे… या सगळ्याचा थरार आता मोठ्या पडद्यावर पाहायला मिळणार आहे.

‘महाराष्ट्र एपस्टीन फाईल्स’ या आगामी मराठी चित्रपटाची सध्या चर्चा रंगली असून, त्यात अभिनेता सुबोध भावेची झालेली एन्ट्री विशेष लक्ष वेधून घेत आहे.

चित्रपटाच्या नव्या टीझर आणि फर्स्ट लूकमधील त्याचा करारी अंदाज, गंभीर चेहऱ्यावरील भाव आणि वजनदार व्यक्तिमत्त्वामुळे प्रेक्षकांची उत्सुकता वाढली आहे. ‘मंत्री असो की आमदार असो… जो कोणी दोषी असेल, त्याला कायद्याच्या चौकटीत यायलाच लागेल.

त्याची गय केली जाणार नाही…’ या संवादातून त्याच्या व्यक्तिरेखेची आक्रमकता समोर येते. त्यामुळे चित्रपटात सुबोध नेमकी कोणती भूमिका साकारणार, सत्तेच्या वर्तुळात कोणती रहस्यं उलगडणार आणि न्यायाच्या संघर्षाला कोणतं वळण मिळणार, याबाबत उत्सुकता निर्माण झाली आहे.

सुबोध भावेचा रुबाबदार लूक; राजकीय भूमिकेची चर्चा

सुबोध भावे हा मराठी मनोरंजनविश्वातील अष्टपैलू अभिनेता म्हणून ओळखला जातो. ऐतिहासिक, चरित्रात्मक आणि विविध धाटणीच्या भूमिकांमधून त्याने प्रेक्षकांवर छाप पाडली आहे. आता ‘महाराष्ट्र एपस्टीन फाईल्स’मधील त्याचा नवा अवतार चर्चेचा विषय ठरला आहे.

पांढराशुभ्र कुर्ता, त्यावर काळ्या रंगाचं बंद गळ्याचं जॅकेट आणि चेहऱ्यावरचं गंभीर भावविश्व असा त्याचा लूक आहे. या टिझरमध्ये सुबोध भावे मुख्यमंत्री देवेंद्र फडणवीस यांच्या भूमिकेत दिसत असल्याची माहिती आहे.

राजकारण, गुन्हेगारी आणि तपासाचा थरार

‘महाराष्ट्र एपस्टीन फाईल्स’ या चित्रपटात राजकीय सत्ताकेंद्रं, गुन्हेगारीचं जाळं आणि तपास यंत्रणांसमोरील आव्हानं यांची पार्श्वभूमी पाहायला मिळणार असल्याचे संकेत टीझरमधून मिळतात. दोषींना कायद्याच्या चौकटीत आणण्याचा प्रयत्न आणि प्रभावशाली व्यक्तींकडून सत्य दडपण्याची शक्यता यांमधील संघर्ष कथानकाला नाट्यमय वळण देणार आहे.

आनंदी पिक्चर्स अमरावती आणि सचिन रोडे पाटील प्रस्तुत या चित्रपटाची निर्मिती मातोश्री एन्टरटेन्मेंट वर्ल्डच्या बॅनरखाली करण्यात आली आहे. देवेंद्र भट, सूर्यकांत भुंडे आणि प्रशांत कदमपुरे यांनी चित्रपटाच्या निर्मितीची जबाबदारी सांभाळली आहे.

चित्रपटाचं दिग्दर्शन स्वरूप सावंत यांनी केलं आहे. कथा, पटकथा आणि संवाद संजय नवगिरे यांचे असून, चित्रपटाची संकल्पना सागरकुमार एस. जैन यांची आहे. राजकीय घडामोडी, सामाजिक वास्तव आणि रहस्यप्रधान कथानक यांची सांगड घालण्याचा प्रयत्न या चित्रपटातून करण्यात आला आहे.

२० नोव्हेंबरला चित्रपटगृहात येणार?

‘महाराष्ट्र एपस्टीन फाईल्स’ हा चित्रपट २० नोव्हेंबर रोजी प्रदर्शित होणार असल्याची माहिती देण्यात आली आहे. राजकीय थरार, रहस्य, तपास आणि प्रभावशाली व्यक्तिरेखांचा संघर्ष यांमुळे या चित्रपटाकडून प्रेक्षकांच्या अपेक्षा वाढल्या आहेत.