Rohit Pawar: नागपूर पदवीधर मतदार संघातून भाजपचे सुधाकर कोहळे आणि काँग्रेसचे अभिजीत वंजारी यांच्यात टफ फाईट झाली. दोन्ही उमेदवारांमधील चुरशीच्या लढतीत अखेर अभिजीत वंजारी यांनी मैदान मारत विजयाचा गुलाल उधळला. अभिजीत वंजारी यांनी सुधाकर कोहळे यांचा 3271 मतांनी पराभव केला.

या निवडणुकीत अपक्ष उमेदवार नितेश कराळे यांच्यामुळे खरी रंगत आली. त्यांना २५ हजार मते मिळाली. त्यांच्या मतपत्रिकेवरील दुसऱ्या आणि तिसऱ्या पसंतीच्या मतांमुळे मतमोजणीचे समीकरण बदलल्याची चर्चा आहे. त्यामुळे नागपूरच्या निकालाची राज्यभरात चर्चा होत आहे.

भाजपने सर्व शक्ती पणाला लावली पण… 

नागपूर पदवीधर मतदारसंघाची जागा जिंकण्यासाठी भाजपने सर्व शक्ती पणाला लावली होती. संपूर्ण संघटनेने एकत्र काम केल्याचे सांगितले होते. देवेंद्र फडणवीस यांनी बंडखोरी केलेल्या अनिल सोले यांच्या घरी जाऊन त्यांची मनधरणी केली होती. प्रचाराच्या शेवटच्या टप्प्यात मुख्यमंत्री देवेंद्र फडणवीस, नितीन गडकरी, चंद्रशेखर बावनकुळे हे बडे नेते मैदानात उरले होते. तरीही भाजपचा पराभव झाल्याने राजकीय वर्तुळात चर्चा रंगली आहे.

मुख्यमंत्री फडणवीसांवर ट्विट डिलीट करण्याची वेळ

सुरुवातीला पंतप्रधान नरेंद्र मोदी, केंद्रीय गृहमंत्री अमित शहा यांनीही निकालावरून काँग्रेसला टोमणा मारला होता. तर मुख्यमंत्री देवेंद्र फडणवीस यांनीही काँग्रेसला डिवचलं होतं. परंतु काँग्रेसने संघाच्या बालेकिल्ल्यात एक जागा जिंकली. नागपूरमध्ये काँग्रेसचा विजय होताच मुख्यमंत्री फडणवीस यांना ट्विट डिलीट करण्याची वेळ आली. यावरून राष्ट्रवादी काँग्रेस शरद पवार गटाचे आमदार रोहित पवार यांनीही मुख्यमंत्री देवेंद्र फडणवीस यांना डिवचणारी एक पोस्ट केली आहे.

रोहित पवार पोस्ट

रोहित पवार यांनी पोस्ट करत लिहिले की, “आदरणीय देवेंद्र फडणवीस साहेब, आपण स्वतः वैयक्तिक लक्ष घातलेल्या नागपूर पदवीधर मतदारसंघात, ज्या ठिकाणी आपण स्वतः घरोघरी जाऊन बंडखोरांना माघार घेण्यासाठी मनवले, त्याच नागपूर मतदारसंघात, संघाचे मुख्यालय असलेल्या भागात भाजपला पराभव बघावा लागला, याचा अर्थ स्पष्ट आहे.

आपल्याला ट्विट डिलीट करावे लागले, याचे दुःख आहेच; पण आपल्या डिलीट झालेल्या ट्विटमध्ये दिसत असलेला सत्तेचा एवढा ईगो बरा नव्हे. असो, समजू शकतो. कदाचित निवडणूक बॅलेटवर झाली होती, याचा आपल्याला विसर पडला असावा, म्हणून आधीच ट्विट झाले असेल.

विजयी उमेदवार अभिजित वंजारी यांचे अभिनंदन, मतदानरूपी आशीर्वाद देणाऱ्या पदवीधरांचे आभार, लढणाऱ्या सर्व उमेदवारांनादेखील शुभेच्छा, असे रोहित पवार यांनी ट्विटमध्ये म्हटले आहे. रोहित पवार आणि काँग्रेस नेत्यांच्या टीकेनंतर आता देवेंद्र फडणवीस नागपूर पदवीधरच्या पराभवाबाबत काय बोलणार, याची उत्सुकता सगळ्यांना लागली आहे.”

कोणाला किती मते मिळाली?

नागपूर पदवीधर मतदारसंघाच्या निवडणुकीत काँग्रेसच्या अभिजीत वंजारी हे विजयी झाले. वंजारी यांना प्रथम व द्वितीय पसंतीक्रमाची एकूण 67 हजार 231 मते मिळाली. तर त्यांचे प्रतिस्पर्धी भारतीय जनता पार्टीचे सुधाकर कोहळे यांना 63 हजार 960 मते मिळाली. अभिजीत वंजारी यांचा 3271 इतक्या मताधिक्याने विजय झाला. तर अपक्ष उमेदवार नितेश कराळे यांना एकूण 25 हजार 909 मतं पडली.

हेही वाचा: 

Israel Elections Result : इस्रायलमध्ये सरकार कोण स्थापन करणार? ; 90% मतमोजणी पूर्ण, अरब पक्ष बनतील किंग मेकर