Domestic Violence – तुला मुलगा होत नाही, असे म्हणत पत्नीला लाथा-बुक्क्यांनी मारहाण करून गळा दाबून जीवे मारण्याचा प्रयत्न केल्याप्रकरणी मांजरी पोलिसांतील पोलीस उपनिरीक्षकासह त्याच्या आईविरुद्ध खुनाच्या प्रयत्नाचा गुन्हा दाखल करण्यात आला आहे. संबंधित उपनिरीक्षकाने बेकायदेशीरपणे गर्भलिंग तपासणी करून गर्भात मुलगी असल्याचे समजल्यानंतर पत्नीवर गर्भपातासाठी दबाव टाकल्याचा आरोपही तक्रारीत केला आहे.

धनाजी रंगराव टोणे आणि अनसूया रंगराव टोणे (रा. शेवाळेवाडी, हडपसर) अशी गुन्हा दाखल झालेल्यांची नावे आहेत. गुन्हा दाखल झाल्यानंतर टोणे सुट्टीवर गेल्याची माहिती पोलिसांनी दिली. धनाजी यांच्या पत्नीने मांजरी पोलिस ठाण्यात दिलेल्या तक्रारीनुसार, धनाजी आणि महिलेचा विवाह १९ मे २०१९ रोजी झाला.

विवाहानंतर अवघ्या दोन महिन्यांतच पतीकडून मानसिक व शारीरिक छळ सुरू झाला. तू नोकरी कर, कमव, असे म्हणत शिवीगाळ व मारहाण केली. २०२० मध्ये महिला गर्भवती असतानाही तिला दर तीन-चार दिवसांनी मारहाण केली जात होती. सात महिन्यांची गर्भवती असताना तिच्या अंगावर बसून मारहाण केल्याचा आरोपही करण्यात आला आहे.

गर्भपातासाठी दबाव
मे २०२५ मध्ये धनाजी आणि त्यांची आई अनसूया यांनी महिलेच्या इच्छेविरुद्ध गर्भलिंग तपासणी केल्याचा आरोप आहे. गर्भात मुलगी असल्याचे समजल्यानंतर दोघांनी गर्भपातासाठी तिच्यावर दबाव टाकला. त्यानंतर महिलेचा जबरदस्तीने गर्भपात केल्याचा आरोप तिने केला आहे. गर्भपातानंतर महिलेने पतीविरुद्ध पोलीस उपायुक्तांकडे तक्रार केली होती. त्यानंतर उपायुक्तांनी धनाजी यांना समज दिली. याचा राग मनात धरून टोणे यांनी पत्नीला मारहाण करत गळा दाबून जीवे मारण्याचा प्रयत्न केला.

लाचखोरीच्या प्रकरणाचा राग
टोणेविरुद्ध २७ जानेवारी २०२२ रोजी मुंबईतील लाचलुचपत प्रतिबंधक विभागाने गुन्हा दाखल केला होता. या प्रकरणाचा राग मनात धरून त्यांनी पत्नीला अमानुष मारहाण केल्याचे तक्रारीत नमूद आहे. या प्रकरणाचा तपास पोलीस निरीक्षक इरफान नदाफ करीत आहेत.