Shirur Drug Bust – शिरूर शहरातील मार्वल कम्फर्ट (सूरज) लॉजिंगच्या खोलीत मेफेड्रॉन (एम.डी) या अंमली पदार्थाची विक्री करण्याच्या उद्देशाने बाळगणाऱ्या दोघांना पुणे ग्रामीण स्थानिक गुन्हे शाखेच्या पथकाने रंगेहात पकडले. बुधवार (दि. १९) रोजी सायंकाळी साडेसहाच्या सुमारास केलेल्या कारवाईत २० ग्रॅम मेफेड्रॉनसह एकूण ९ लाख १० हजार रुपयांचा मुद्देमाल जप्त केला आहे. शिरूर तालुक्यातील ही दुसरी कारवाई आहे.

याप्रकरणी दादा धावडे (वय २७, रा. राजापूर, अहिल्यानगर), अमोल राजाराम पोटावळे (वय ३५, रा. राजापूर, जि. अहिल्यानगर), असे जेरबंद केलेल्यांची नावे आहेत. शिरूर पोलीस ठाण्यात दोघांवर गुन्हा दाखल केला आहे. पोलिसांनी दिलेल्या माहितीनुसार, शिरूर शहर हद्दीतील लॉजिंगमध्ये संशयितांकडे अंमली पदार्थ असल्याची माहिती स्थानिक गुन्हे शाखेला मिळाली होती.

त्यानुसार पथकाने कारवाई केली. झडतीदरम्यान आरोपींच्या ताब्यात २० ग्रॅमची मेफेड्रॉन पावडर आढळून आली. हा अंमली पदार्थ विक्रीच्या उद्देशाने जवळ बाळगले होते. कारवाईत पोलिसांनी मेफेड्रॉन, दोन मोबाइल फोन, स्कॉर्पिओ कार असा मुद्देमाल जप्त केला आहे. पुढील तपास शिरूर पोलिस करीत आहेत.

तळागाळात रॅकेटची पाळेमुळे
शिरूर तालुक्यात अंमली पदार्थाचा विळखा पडला आहे. पंजाबसारखी भयावह परिस्थिती होईल, अशी प्रतिक्रिया उमटत आहे. अमली पदार्थावरील कारवाईमुळे शिरूर शहरात विक्री करणाऱ्यांचे धाबे दणाणले असून लॉजिंगमध्ये सुरू असलेल्या अशा गैरप्रकारांवर पोलिसांनी अधिक कडक कारवाई करावी, अशी अपेक्षा नागरिकांकडून व्यक्त होत आहे. अंमली पदार्थांचा पुरवठा नेमका कुठून होत होता. या प्रकरणामागे आणखी कोणाचा सहभाग आहे का, याचा तपास पोलिसांकडून सुरू आहे.