PMC News – महापालिकेच्या पुणे प्रथम या संकल्पनेअंतर्गत निरोगी सखी राहील सुखी-महापौर महिला आरोग्य अभियान राबवण्यात येत आहे. या अभियानाच्या दुसऱ्या टप्प्याला गुरूवारपासून सुरुवात झाली. महिलांचे आरोग्य हे कुटुंबाच्या आणि समाजाच्या आरोग्याचा पाया आहे. अनेक महिला आपल्या कुटुंबाच्या जबाबदाऱ्या पार पाडताना स्वतःच्या आरोग्याकडे दुर्लक्ष करतात.

त्यामुळे महिलांना त्यांच्या दैनंदिन जीवनाच्या जवळ आरोग्य तपासणी आणि मार्गदर्शन उपलब्ध करून देण्याच्या उद्देशाने निरोगी सखी राहील सुखी, हे अभियान सुरू केल्याचे महापौर नागपुरे यांनी सांगितले. या अभियानाच्या माध्यमातून महिलांना आरोग्य तपासणी, प्राथमिक निदान, आवश्यक वैद्यकीय मार्गदर्शन आणि आरोग्यविषयक जनजागृती उपलब्ध करून देण्यावर भर देण्यात येत आहे. महिलांनी आजाराची लक्षणे जाणवण्याची वाट न पाहता नियमित आरोग्य तपासणी करून घेणे आवश्यक असल्याचेही महापौरांनी सांगितले.

या निमित्ताने आयोजित कार्यक्रमाला महापौर मंजुषा नागपुरे, उपमहापौर परशुराम वाडेकर, अतिरिक्त आयुक्त पवनीत काैर, नगरसचिव योगिता भोसले, नगरसेविका संगीता दांगट, ऐश्वर्या थोरात, अल्पना वर्पे, स्वरदा बापट, स्वप्नाली पंडीत, अर्चना पाटील, पूजा दांडेकर, रूपाली पवार, स्नेहा माळवदे, मनिषा बुटाला, कल्पना बहिरट, रुपाली पवार, शैलजा भोसले, जयश्री भुमकर तसेच आरोग्य प्रमुख मीना बोराडे, डॉ. वैशाली जाधव, डॉ. मनीषा नाईक, डॉ. राजेश दिघे, डॉ. आंधळे, सारिका फुंदे आदी उपस्थित होते.

“निरोगी सखी राहील सुखी हे अभियान केवळ आरोग्य तपासणीपुरते मर्यादित न राहता महिलांमध्ये प्रतिबंधात्मक आरोग्याची जाणीव निर्माण करणारे व्यापक अभियान म्हणून पुढे नेण्याचा पुणे महापालिकेचा मानस आहे. पुणे शहरातील अधिकाधिक महिलांपर्यंत या अभियानाचा लाभ पोहोचवण्यासाठी आरोग्य विभाग प्रभावी नियोजन करीत आहे.”
– मंजुषा नागपुरे, महापौर, पुणे