पुणे : पुण्यातील दीनानाथ मंगेशकर रुग्णालय वादाच्या भोवऱ्यात सापडले असून रुग्णालयाच्या अडचणी दिवसेंदिवस वाढतच चालल्या आहेत. तनिषा भिसे मृत्यू प्रकरणानंतर आता एक नवी माहिती समोर आली आहे. दीनानाथ मंगेशकर रुग्णालयाने पुणे महानगरपालिकेचा २०१९ पासुनचा प्रॅापर्टी टॅक्स थकवला आहे. हा कर थोडाथोडका नसून तब्बल २७ कोटी ३८ लाख रुपयांचा कर थकवल्याची माहिती समोर आली आहे. रुग्णालय चालविण्याची जबाबदारी असणाऱ्या लता मंगेशकर मेडिकल फाउंडेशनने एकही रुपयांचा कर भरलेला नसल्याचे महापालिकेने सादर केलेल्या अहवालावरुन स्पष्ट झाले आहे. प्रॉपर्टी टॅक्स थकवला तर एकिकडे सर्वसामान्यांना पुणे महानगरपालिका प्रचंड त्रास देते. दंडात्मक आणि जप्तीची कारवाई देखील केली जाते. मात्र, दीनानाथ मंगेशकर रुग्णालयावर मेहरबानीची भूमिका महापालिकेने घेतल्याचे दिसत आहे. दीनानाथ मंगेशकर रुग्णालयावर दंडात्मक कारवाई करण्यात यावी, याकरिता पुणे महानगरपालिका उप आयुक्त यांना महाराष्ट्र प्रदेश युवक काँग्रेसच्या वतीने निवेदन देण्यात येणार आहे. दीनानाथ मंगेशकर रुग्णालयाच्या व्यवस्थापनाने गेल्या सहा वर्षांपासून पुणे महानगर पालिकेचा २७ कोटी ३८ लाख ६२ हजार ८७४ रुपयांच कर थकवला आहे. धर्मदाय रुग्णालयांना मिळकतकर सवलत असल्याचा दावा केला जात असला, तरी महापालिकेने मात्र लता मंगेशकर मेडिकल फाउंडेशनकडे २७ कोटींची थकबाकी दाखविली आहे. त्यामुळे महापालिका हा कर वसूल करणार का? महापालिका मंगेशकर रुग्णालयावर मेहरबान का? असे प्रश्न आता उपस्थित झाले आहेत. सामान्यांना मिळकत करासाठी भांडावून सोडणारा मिळकतकर विभाग मंगेशकर हॉस्पिटल वर मेहेरबान असल्याच्या चर्चा आता जोर धरु लागल्या आहेत, याच पार्शवभूमीवर आता पुणे महानगरपालिका मिळकत कर विभागाचे उप आयुक्त यांना महाराष्ट्र प्रदेश युवक काँग्रेसच्या वतीने निवेदन देण्यात येणार आहे. याबाबतची माहिती महाराष्ट्र प्रदेश युवक काँग्रेसचे सरचिटणीस रोहन सुरवसे-पाटील यांनी दिली आहे.
