Pune : दिवाळीचा आनंद समाजातील प्रत्येक घटकासोबत वाटून घेण्याच्या उद्देशाने दीवा प्रतिष्ठान आणि नगरसेवक हर्षवर्धन दीपक मानकर यांच्या संयुक्त विद्यमाने पुणे महानगरपालिकेच्या कायमस्वरूपी तसेच कंत्राटी स्वच्छता कर्मचाऱ्यांना दिवाळी सरंजामाचे वाटप करण्यात आले. गेल्या नऊ वर्षांपासून हा उपक्रम सातत्याने राबविण्यात येत आहे.

पुणे शहर स्वच्छ आणि सुंदर ठेवण्यासाठी स्वच्छता कर्मचारी दररोज मेहनत घेतात. ऊन, पाऊस तसेच सण-उत्सवांची पर्वा न करता ते आपले कर्तव्य बजावत असतात. त्यांच्या कामामुळे नागरिकांना स्वच्छ परिसर मिळतो आणि शहरातील सार्वजनिक आरोग्य राखण्यास मदत होते.

या कर्मचाऱ्यांच्या योगदानाची जाणीव ठेवून दिवाळीच्या काळात त्यांच्या आनंदात सहभागी होण्यासाठी हा उपक्रम आयोजित करण्यात आला. दीवा प्रतिष्ठानच्या माध्यमातून गेल्या नऊ वर्षांपासून सुरू असलेला हा उपक्रम केवळ दिवाळी सरंजाम वाटपापुरता मर्यादित नसून स्वच्छता कर्मचाऱ्यांप्रती आदर आणि कृतज्ञता व्यक्त करणारा असल्याचे सांगण्यात आले.

नगरसेवक हर्षवर्धन मानकर म्हणाले, “पुणे शहर स्वच्छ ठेवण्यात स्वच्छता कर्मचाऱ्यांचे योगदान महत्त्वाचे आहे. आपण दिवाळी साजरी करत असताना हे कर्मचारी आपले कर्तव्य बजावत असतात. त्यामुळे त्यांच्या कामाचा सन्मान करणे आणि त्यांच्या आनंदात सहभागी होणे ही आपली सामाजिक जबाबदारी आहे. दीवा प्रतिष्ठानच्या माध्यमातून सुरू असलेला हा उपक्रम यापुढेही सुरू ठेवण्याचा प्रयत्न राहील.”

या उपक्रमातून स्वच्छता कर्मचाऱ्यांप्रती कृतज्ञता व्यक्त करण्यासोबतच सामाजिक एकोपा आणि माणुसकीचा संदेश देण्यात आला. समाजातील विविध घटकांच्या सुख-दुःखात सहभागी होण्याची भावना या उपक्रमातून अधोरेखित झाली.