Dimbhe Dam – आंबेगाव तालुक्याच्या आदिवासी डोंगरी भागात गेल्या काही दिवसांपासून सुरू असलेल्या संततधार पावसामुळे हुतात्मा बाबू गेनू सागर डिंभे धरणाच्या पाणीसाठ्यात सातत्याने वाढ होत आहे. त्यामुळे खबरदारीचा उपाय म्हणून शुक्रवारी (दि. 31) सकाळी 10.30 वाजल्यापासून धरणाच्या सांडव्यातून करण्यात येणार्‍या पाण्याच्या विसर्गात वाढ करण्यात आली आहे.

यापूर्वी धरणाच्या सांडव्यातून 6,800 घनफूट प्रति सेकंद वेगाने पाणी सोडण्यात येत होते. हा विसर्ग वाढवून आता 8,500 घनफूट प्रति सेकंद करण्यात आला आहे. याशिवाय जलविद्युत केंद्रातून 550 घनफूट प्रति सेकंद पाण्याचा विसर्ग सुरू असून सिंचनासाठी सध्या कोणताही विसर्ग करण्यात आलेला नाही. त्यामुळे धरणातून सध्या एकूण 9,050 घनफूट प्रति सेकंद पाणी बाहेर सोडले जात आहे.

यापैकी 8,970 घनफूट प्रति सेकंद पाणी घोड नदीपात्रात, तर उजव्या कालव्यातून 80 घनफूट प्रति सेकंद पाणी सोडण्यात येत आहे. धरणाच्या पाणलोट क्षेत्रात पाऊस कायम असल्याने पाणीसाठ्यात वाढ होत असून परिस्थितीनुसार पुढील काळात विसर्गात आवश्यकतेनुसार बदल केला जाऊ शकतो. त्यामुळे घोड नदीकाठच्या गावांतील नागरिक, शेतकरी आणि पशुपालकांनी विशेष सतर्कता बाळगावी, नदीपात्रात जाणे टाळावे तसेच जनावरे, शेतीची अवजारे आणि अन्य साहित्य सुरक्षित ठिकाणी हलवावे, असे आवाहन जलसंपदा विभागाने केले आहे.

“धरणातील पाणीसाठा सातत्याने वाढत असल्याने खबरदारीचा उपाय म्हणून विसर्ग वाढविण्यात आला आहे. घोड नदीकाठच्या नागरिकांनी सतर्क राहून नदीपात्रात जाणे टाळावे आणि प्रशासनाच्या सूचनांचे काटेकोर पालन करावे.”
– दत्तात्रय कोकणे, उपअभियंता, जलसंपदा विभाग, कुकडी प्रकल्प