Devendra Fadnavis – एखादा सण आणि उत्सव आपण साजरा करतो, तेव्हा तो जास्तीत जास्त पारंपरिक पद्धतीने साजरा केला, तर त्याचा महत्व अधिक असते; पण वर्षानुवर्ष सण साजरा करताना काही पद्धती पडतात. त्या पद्धती बंद करताना केवळ कायद्याच्या बडग्याने बंद न करता लोकांना विश्वासात घेऊन त्यावर मार्ग काढणे अधिक गरजेचे असल्याचे मुख्यमंत्री देवेंद्र फडणवीस यांनी सांगितले.

पुण्यात गणेशोत्सव असेल, इतर सर्व उत्सव असतील, चांगल्या पारंपरिक पद्धतीने साजरे होताना दिसतील. लोकसहभागानेच हे डीजेचे स्तोम कमी होताना, संपताना दिसेल असा विश्वासही मुख्यमंत्र्यांनी व्यक्त केला. पुण्यात एका कार्यक्रमानंतर मुख्यमंत्री फडणवीस यांनी माध्यमांशी संवाद साधला. डीजेवरून होणाऱ्या ध्वनिप्रदूषणाबद्दल विचारले असता ते बोलत होते.

या वेळी फडणवीस म्हणाले, की कायदा तर वापरावा लागतो, त्याशिवाय बंद होत नाही. मात्र, लोकांना विश्वासात घेऊन त्यातून मार्ग काढणे गरजेचे असते. आज माझी पुणे पोलीस आयुक्तांशी चर्चा झाली. त्यांनी सांगितलं की बऱ्याच गोष्टींवर सर्वांचे एकमत झाले आहे. विशेषत: ज्या गोष्टींचा लोकांना त्रास होतो. डीजेमध्ये भूकंप आल्यासारखा आवाज असतो, अशा सगळ्या गोष्टींवर जवळपास सर्वांच एकमत होत आहे.

थोडा वेळ दिला पाहिजे
डीजे बंदीसाठी काही धोरण तयार करणार का, याबाबत विचारले असता मुख्यमंत्री म्हणाले, की धोरण एकदम तयार होत नाही. अनुभव असा आहे, की सगळ्या ठिकाणी चर्चेतून ९० ते ९५ टक्के लोक तयार होतात. मग आदेश काढता येतो. अजून थोडा वेळ दिला पाहिजे. दिशा पक्की ठरली आहे, आपल्याला पारंपरिकतेकडे किंवा ध्वनिप्रदूषणापासून आपल्याला दूर जायचे आहे.

हिंसाचार योग्य नाही
डीजेविरोधी भूमिका मांडणाऱ्या विद्यानंद बापट यांच्यावर झालेल्या हल्ल्याबाबत विचारले असता, फडणवीस म्हणाले, की त्या घटनेचा मी निषेध केला आहे. प्रत्येकाचा दृष्टिकोन असतो. वेगवेगळे विचार असू शकतात. काही या बाजूचे, काही त्या बाजूचे लोक असू शकतात; पण हिंसाचार योग्य नाही. प्रत्येकाने आपापला मुद्दा मांडला पाहिजे.

बापटांनी समावेशक मांडणी करावी
मुख्यमंत्री म्हणाले, की मराठीच्या शुद्धतेचा एक नमुना आपल्याला त्यांच्या बोलण्यामध्ये पाहायला मिळतो. ते अतिशय शुद्ध मराठी बोलतात, जी ऐकून आपल्याला आनंद होतो. त्यांनी विचार मांडतानाही इतरांना विचारांचा फार त्रास होणार नाही. अशी सर्वसमावेशक मांडणी करावी. अकोमोडेटिव्ह शब्दासाठी नेमका कोणता मराठी वापरतात, असे त्यांनी पत्रकारांना विचारले.