Disaster Management : बिहारमध्ये गंगा, पुनपुन आणि दरधा नद्यांच्या वाढत्या पाणीपातळीमुळे पूरस्थिती गंभीर होण्याची शक्यता निर्माण झाली आहे. राज्यातील पटना, नालंदा, भोजपूर, वैशाली, सारण, बेगूसराय, लखीसराय आणि जहानाबाद या ८ जिल्ह्यांना गुरुवारी पूराचा इशारा देण्यात आला.

या जिल्ह्यांतील अनेक भागांमध्ये पाणी शिरले असून, पटण्यातील ग्रामीण दियारा भागानंतर आता शहरी परिसरालाही पुराच्या पाण्याचा फटका बसू लागला आहे.

आपत्ती व्यवस्थापन विभागाचे सचिव संतोष मल्ल यांनी संबंधित जिल्हाधिकाऱ्यांना विशेष सतर्क राहण्याच्या सूचना दिल्या आहेत. नद्यांच्या पाणीपातळीवर सातत्याने लक्ष ठेवण्यासह पाणी वाढल्यास तातडीने मदत व बचावकार्य सुरू करण्याचे निर्देश देण्यात आले आहेत.

सम्राट चौधरींकडून पाहणी –

मुख्यमंत्री सम्राट चौधरी यांनी गुरुवारी पटण्यात गंगा नदीच्या वाढत्या पाणीपातळीची पाहणी केली. बेंगळुरूला रवाना होण्यापूर्वी त्यांनी अधिकाऱ्यांकडून परिस्थितीचा आढावा घेतला. नागरिकांची गैरसोय होऊ नये आणि जीवितहानी टाळता यावी, यासाठी आवश्यक उपाययोजना करण्याचे निर्देश त्यांनी दिले. शुक्रवारी मुख्यमंत्री पूरग्रस्त भागांचा हवाई सर्वेक्षण करून वरिष्ठ अधिकाऱ्यांसोबत मदत आणि बचावकार्याचा आढावा घेणार आहेत.

कमांड कंट्रोल रूममधून परिस्थितीवर नजर –

उपमुख्यमंत्री विजय चौधरी यांनी जलसंसाधन विभागाच्या कमांड अँड कंट्रोल सेंटरमधून व्हिडिओ कॉन्फरन्सिंगद्वारे पूरस्थितीचा आढावा घेतला. तटबंदी फुटल्याच्या ठिकाणांचीही पाहणी करण्यात आली. दक्षिण बिहारमधील पुनपुन आणि दरधा नदीसह भागलपूरमधील गंगा नदीच्या तटबंदीची स्थिती तपासण्यात आली.

तटबंदीची परिस्थिती नियंत्रणात आणण्यासाठी स्टीमरच्या मदतीने मेगा जिओ-बॅग लावण्यात येत आहेत. जलसंसाधन विभागाचे अधिकारी आणि अभियंते तटबंदीवर तैनात असून, कमांड कंट्रोल रूममधून संपूर्ण बिहारमधील परिस्थितीवर लक्ष ठेवले जात आहे.

नीतीश कुमारांनीही घेतला आढावा –

माजी मुख्यमंत्री आणि जनता दल युनायटेडचे राष्ट्रीय अध्यक्ष नीतीश कुमार यांनीही गुरुवारी पूरस्थितीचा आढावा घेतला. त्यांनी महात्मा गांधी सेतूवरून गंगा नदीच्या वाढलेल्या पाणीपातळीची पाहणी केली. यावेळी जेडीयूचे राष्ट्रीय कार्यकारी अध्यक्ष संजय कुमार झा उपस्थित होते.

पीएचईडी कर्मचाऱ्यांच्या सुट्ट्या रद्द –

गंगा नदीच्या वाढत्या पाण्यामुळे पटना जिल्ह्यातील सखल आणि दियारा भागात परिस्थिती गंभीर झाली आहे. प्रभावित नागरिकांना मूलभूत सुविधा उपलब्ध करून देण्यासाठी तसेच संसर्गजन्य आजारांपासून संरक्षण करण्यासाठी लोक स्वास्थ्य अभियंत्रण विभागाने (पीएचईडी) मोठ्या प्रमाणावर मदतकार्य सुरू केले आहे.

परिस्थिती सामान्य होईपर्यंत विभागातील सर्व पर्यवेक्षक आणि जिल्हा कार्यालयातील अधिकाऱ्यांच्या सुट्ट्या तात्काळ प्रभावाने रद्द करण्यात आल्या आहेत.