Ganeshotsav 2026 – डीजेच्या कर्णकर्कश आवाजाला फाटा देत यंदाच्या गणेशोत्सवात ‘जेन झी’ पिढीचा कल पुन्हा पारंपरिक वाद्यांकडे वळला आहे. ढोल-ताशांच्या तालावर गणरायाचे स्वागत करण्याची तरुणाईमध्ये चांगलीच क्रेझ निर्माण झाली आहे. शहरातील विविध भागांत ढोल-ताशा पथकांचे सराव सुरू झाले आहेत. त्यामुळे यंदाच्या गणेशोत्सवात डीजेऐवजी पारंपरिक वादनाचा निनाद अधिक घुमण्याची शक्यता आहे.

गणेशोत्सवासाठी शहरातील सार्वजनिक गणेश मंडळांची तयारी अंतिम टप्प्यात आली आहे. आगमन मिरवणुकीपासून विसर्जन मिरवणुकीपर्यंत विविध उपक्रमांचे नियोजन केले जात आहे. मात्र, गेल्या काही वर्षांपासून वाढलेल्या डीजेच्या दणदणाटामुळे ध्वनिप्रदूषणाचा प्रश्न गंभीर बनला आहे. या पार्श्वभूमीवर अनेक मंडळांनी पारंपरिक वाद्यांना प्राधान्य देण्यास सुरुवात केली आहे.

ढोल-ताशांच्या तालावर तरुणाई थिरकणार
पिंपरी, चिंचवड, भोसरी, निगडी, आकुर्डी, वाकड यासह शहरातील अनेक भागांत ढोल-ताशा पथकांचा सराव सुरू आहे. सायंकाळच्या वेळी मैदानांवर तरुण-तरुणींची मोठी गर्दी होत आहे. ढोल, ताशा, झांज, लेझीम, हलगी आणि संबळ यांच्या तालाचा सराव केला जात आहे.

विशेष म्हणजे, ढोल-ताशा वादनाकडे तरुणींचाही मोठ्या प्रमाणात कल वाढला आहे. तालबद्ध वादनासोबत शिस्त, सांघिक भावना आणि उत्साह यांचा संगम या पथकांमध्ये पाहायला मिळत आहे. त्यामुळे गणेशोत्सवाच्या मिरवणुकांमध्ये पारंपरिक वाद्यांचे पथक हे प्रमुख आकर्षण ठरण्याची चिन्हे आहेत.

डीजेच्या आवाजाला नागरिकांचा विरोध
गणेशोत्सवातील डीजेच्या वाढत्या आवाजाबाबत नागरिकांमध्ये नाराजी आहे. रात्री उशिरापर्यंत सुरू राहणाऱ्या कर्णकर्कश आवाजामुळे ज्येष्ठ नागरिक, विद्यार्थी, रुग्ण आणि लहान मुलांना त्रास होतो. अनेक नागरिकांनी यंदा ध्वनिप्रदूषणाला आळा घालण्याची मागणी केली आहे. उत्सवाचा उत्साह कायम ठेवून ध्वनिमर्यादांचे पालन करावे, अशी अपेक्षा व्यक्त होत आहे. त्यामुळे डीजेऐवजी ढोल-ताशा आणि अन्य पारंपरिक वाद्यांना पसंती मिळत असल्याचे चित्र आहे.

लेझर शोवरही नागरिकांची नाराजी
मिरवणुकांमध्ये वापरल्या जाणाऱ्या तीव्र लेझर किरणांबाबतही नागरिकांकडून चिंता व्यक्त केली जात आहे. डोळ्यांवर थेट लेझर किरण पडू नयेत, यासाठी नियमांचे काटेकोर पालन करण्याची मागणी होत आहे. उत्सवातील मनोरंजनाच्या नावाखाली नागरिकांच्या आरोग्याला धोका निर्माण होऊ नये, अशी भूमिका नागरिकांनी घेतली आहे.