Santosh Pandit Arrested – महाराष्ट्राचे उच्च व तंत्रशिक्षण मंत्री चंद्रकांत पाटील आणि पुणे महापालिकेच्या विधी समिती सदस्या मिताली साळवेकर यांच्याबाबत यूट्यूबवर अश्लील व आक्षेपार्ह वक्तव्ये केल्याप्रकरणी संतोष पंडित (वय ४५) याला कोथरुड पोलिसांनी अटक केली आहे. सोशल मीडियावर अश्लील स्वरूपाची शेरेबाजी करणारे व्हिडिओ प्रसारित करून महिलांचा विनयभंग तसेच मंत्र्यांची बदनामी केल्याचा आरोप त्याच्यावर करण्यात आला आहे.

याबाबत सारिका राम कांबळे (वय ३६) यांनी पोलिसांकडे तक्रार दिली. तक्रारीनुसार, २ सप्टेंबरला त्या घरी असताना यूट्यूबवरील ‘@SantoshPandit6278’ या अकाउंटवरील व्हिडिओ त्यांच्या निदर्शनास आला. या व्हिडिओमध्ये चंद्रकांत पाटील आणि मिताली साळवेकर यांच्याबाबत अश्लील व लैंगिक स्वरूपाची शेरेबाजी करण्यात आल्याचा आरोप आहे. संबंधित व्हिडिओला लाखो व्ह्यूज मिळाल्याचे तक्रारीत नमूद आहे.

तसेच, आणखी एका व्हिडिओमध्ये मुख्यमंत्री देवेंद्र फडणवीस यांच्याबाबतही अश्लील आणि आक्षेपार्ह मजकूर वापरल्याचा आरोप तक्रारदार महिलेने केला आहे. हा व्हिडिओही मोठ्या प्रमाणात प्रसारित झाल्याचे तक्रारीत म्हटले आहे. संतोष पंडित याने १० जुलै ते ११ ऑगस्ट तसेच २ सप्टेंबरदरम्यान चंद्रकांत पाटील यांच्याबाबत अश्लील शब्दांचा वापर करून, आक्षेपार्ह हातवारे करत व्हिडिओ प्रसारित केल्याचा आरोप आहे.

या माध्यमातून पाटील यांची बदनामी करण्यासोबतच समाजात गैरसमज व तेढ निर्माण करण्याचा प्रयत्न केल्याचे तक्रारीत नमूद करण्यात आले आहे. या प्रकरणी पोलिसांनी तक्रारीची दखल घेत संतोष पंडित याला गुरुवारी रात्री अटक केली. याप्रकरणात पहिला गुन्हा डेक्कन पोलीस ठाण्यात दाखल झाला होता. दुसरा गुन्हा कोथरुड पोलीस ठाण्यात दाखल झाला.