Congress Former MP : सोलापूरचे काँग्रेसचे माजी खासदार गंगाधरपंत कुचन (वय ९१) यांचे आज पहाटे हृदयविकाराच्या झटक्याने निधन झाले. खासगी रुग्णालयात उपचार सुरू असताना त्यांनी अखेरचा श्वास घेतला. त्यांच्या निधनामुळे सोलापूरच्या राजकीय आणि सहकार क्षेत्रात हळहळ व्यक्त होत आहे. विशेष म्हणजे कुचन कुटुंबीयांनी त्यांचा देहदान करण्याचा निर्णय घेतला आहे. (Congress Former MP) गंगाधरपंत कुचन हे महाराष्ट्राचे पहिले मुख्यमंत्री यशवंतराव चव्हाण आणि माजी मुख्यमंत्री वसंतदादा पाटील यांचे खंदे समर्थक म्हणून ओळखले जात होते. त्यांनी सोलापूर लोकसभा मतदारसंघातून काँग्रेसच्या तिकिटावर १९८० आणि १९८५ या दोन निवडणुकांमध्ये विजय मिळवला होता. १९९१ मध्ये त्यांनी भाजपमध्ये प्रवेश केला होता. सोलापूर शहर उत्तर विधानसभा मतदारसंघात भाजप उमेदवार लिंगराज वल्याळ यांच्या विजयासाठी त्यांनी महत्त्वाची भूमिका बजावली होती. त्यानंतर काही वर्षांनी त्यांनी पुन्हा काँग्रेसमध्ये पुनरागमन केले. (Congress Former MP) सहकार क्षेत्रातील मोठे योगदान सोलापूर शहर आणि जिल्ह्यातील सहकार क्षेत्रात गंगाधरपंत कुचन यांचे मोठे योगदान राहिले. नागरी बँका, पतसंस्था आणि सूतगिरण्यांच्या उभारणीत त्यांचा सक्रिय सहभाग होता. अश्विनी सहकारी रुग्णालय आणि मार्कंडेय सहकारी रुग्णालयाच्या स्थापनेतही त्यांनी महत्त्वाची भूमिका बजावली होती. गेल्या काही दिवसांपासून त्यांची प्रकृती खालावली होती. उपचारासाठी त्यांना अश्विनी रुग्णालयात दाखल करण्यात आले होते. मात्र आज पहाटे त्यांचे निधन झाले. त्यांच्या पश्चात तीन विवाहित मुलगे, दोन विवाहित मुली, सुना, नातवंडे आणि जावई असा परिवार आहे. (Congress Former MP)