Chaskaman Canal – शिक्रापूर (ता. शिरूर) येथील चासकमान कालवा उपविभागा अंतर्गत येणाऱ्या चासकमान कालव्याची तोडफोड करून पाण्याच्या प्रवाहामध्ये बदल केल्याची घटना घडली. शिक्रापूर पोलीस स्टेशन येथे रवींद्र मारुती शिवरकर या शेतकऱ्यावर गुन्हा दाखल केला आहे. शिक्रापूर येथील चासकमान कालवा उपविभागा अंतर्गत येणाऱ्या चासकमान कालव्याच्या वितरिका क्रमांक १३ च्या लघुवीतरिका क्रमांक ३ ची

एका शेतकऱ्याने तोडफोड केल्याची माहिती चासकमान विभागाच्या अधिकाऱ्यांना मिळाली. अधिकाऱ्यांनी घटनास्थळी जाऊन पाहणी केली असता जमीन गट नंबर ७३९ जवळील शेतकरी रवींद्र शिवरकर यांनी चासकमान कालव्याचा भराव काढून टाकून, पाण्याचा वॉल हेड तोडून कालव्यामध्ये खोलवर सिमेंट पाईप टाकून पाण्याचा प्रवाह बदलला असल्याने कालव्याचे लाखो रुपयांचे नुकसान होऊन आजूबाजूच्या शेतकऱ्यांना पाण्यापासून वंचित राहावे लागत असल्याचे समोर आले.

दरम्यान, चासकमान विभागाच्या अधिकाऱ्यांनी शेतकऱ्याला नोटीस देऊन कालव्याची दुरुस्ती करण्याबाबत सांगितले. मात्र, शेतकऱ्याने कोणतीही दुरुस्ती केली नसल्याने याबाबत चासकमान विभागाच्या कनिष्ठ अभियंता पूजा विष्णुदास दिवसे यांनी शिक्रापूर पोलीस स्टेशन येथे फिर्याद दिली आहे. पोलिसांनी रवींद्र मारुती शिवरकर (रा. बालाजी पार्क वाघोली, ता. हवेली) याच्याविरुद्ध गुन्हा दाखल केला आहे. पुढील तपास हवालदार हनुमंत गिरमकर हे करीत आहेत.

कालव्यावर भराव टाकणारे व बुजवणारे रडारवर
शिक्रापूर परिसरात अनेक ठिकाणी शेतकरी, उद्योजक व नागरिकांनी कालव्याचे भराव सपाट केल्याच्या, कालवा बुजवल्याच्या तसेच पाईप टाकून रस्ता बनवल्याचा घटना समोर आलेल्या आहेत. लवकरच अशा ठिकाणची पाहणी करुन संबंधितांवर गुन्हा दाखल करण्यात येणार असल्याचे चासकमान विभागाच्या अधिकाऱ्यांनी सांगितले.