BMC Election 2026 : आशियातील सर्वात श्रीमंत महापालिका म्हणून ओळखल्या जाणाऱ्या बृहन्मुंबई महानगरपालिकेच्या (BMC) निवडणुकीचे बिगुल वाजले असून राजकीय हालचालींना वेग आला आहे. आगामी २०२६ च्या निवडणुकीसाठी सत्ताधारी महायुतीमधील भाजप आणि शिवसेना (एकनाथ शिंदे गट) यांच्यातील जागावाटपाचा तिढा सुटल्याची माहिती सूत्रांनी दिली आहे. नव्या सूत्रानुसार, मुंबईतील २२७ जागांपैकी भाजप १४० जागांवर, तर शिवसेना ८७ जागांवर निवडणूक लढवणार असल्याचे जवळपास निश्चित झाले आहे. अजित पवार गट स्वतंत्र लढणार यावेळच्या निवडणुकीचे सर्वात मोठे वैशिष्ट्य म्हणजे महायुतीतील घटक पक्ष असलेला अजित पवारांचा राष्ट्रवादी काँग्रेस पक्ष मुंबईत स्वतंत्रपणे नशीब आजमावणार आहे. त्यामुळे भाजप आणि शिंदे यांची शिवसेना मिळून सर्व २२७ जागा लढवतील. सुरुवातीला भाजपने शिंदे गटाला केवळ ५२ जागांचा प्रस्ताव दिला होता, मात्र बदललेली राजकीय परिस्थिती आणि ठाकरे बंधूंमधील संभाव्य जवळीक पाहता, भाजपने आपला पवित्रा बदलत शिवसेनेला अधिक जागा देण्याचे मान्य केल्याचे समजते. बंडखोरी रोखण्यासाठी भाजपचा ‘वेट अँड वॉच’ मुंबईत मोठ्या प्रमाणावर इच्छुकांची गर्दी असल्याने भाजपने अद्याप एकही अधिकृत उमेदवार जाहीर केलेला नाही. उमेदवारीवरून पक्षात बंडखोरी होऊ नये, यासाठी पक्षाने ‘वेट अँड वॉच’चे धोरण अवलंबले आहे. ठाणे, नवी मुंबई आणि कल्याण-डोंबिवलीतील जागावाटपाचा पेचही उद्यापर्यंत सुटण्याची शक्यता आहे. मार्च २०२२ पासून मुंबई महापालिकेवर प्रशासक राज आहे. २०१७ च्या निवडणुकीत शिवसेना आणि भाजपमध्ये चुरशीची लढत झाली होती, ज्यात शिवसेनेला ८४ तर भाजपला ८२ जागा मिळाल्या होत्या. तब्बल चार वर्षांच्या प्रतीक्षेनंतर होणाऱ्या या निवडणुकीत मुंबईवर कोणाचा भगवा फडकणार, याकडे संपूर्ण राज्याचे लक्ष लागले आहे. दरम्यान, राज्य निवडणूक आयोगाच्या सूचनेनुसार, मुंबईसह राज्यातील महत्त्वाच्या महापालिकांसाठी १५ जानेवारी २०२६ रोजी मतदान पार पडणार असून, १६ जानेवारी रोजी निकाल जाहीर होतील. त्यासाठी अर्ज भरण्याची मुदत: २३ ते ३० डिसेंबर, छाननी: ३१ डिसेंबर, अर्ज माघारी: २ जानेवारी आणि चिन्ह वाटप: ३ जानेवारीला होणार आहे.
