बीड : वाल्मिक कराडचा कट्टर समर्थक असलेल्या रघुनाथ फड गँगवर मकोका अंतर्गत कारवाई करण्यात आली होती. परळी तालुक्यातील सहदेव सातभाई यांच्यावर हल्ला करत हत्येचा प्रयत्न केल्या प्रकरणी बीड पोलिसांनी 7 जणांवर मकोका अंतर्गत कारवाई केली होती. पण यामधून आता 5 जणांना दिलासा देण्यात आला आहे. पोलिस महासंचालकांनी त्यांच्यावरील मकोका रद्द केला आहे. गोट्या गित्ते, जगन्नाथ फड, संदीप सोनवणे, बालाजी दहिफळे, विलास गित्ते यांच्यावरील मकोका हटवण्यात आला आहे. तर, गँगचा मोरक्या रघुनाथ फड आणि धनराज फड यांच्यावरील मकोका कायम ठेवण्यात आला आहे. गेल्या वर्षी मस्साजोगचे सरपंच संतोष देशमुख यांची अपहरण करून हत्या केल्याचे प्रकरण चांगलेच गाजले होते. या प्रकरणात वाल्मिक कराडसह त्याच्या टोळीवर मकोका अंतर्गत गुन्हे दाखल केले होते. यानंतर जिल्ह्यातील इतर चार टोळ्यांवरही मकोकाअंतर्गत कारवाई केली गेली. यात फड गँगचाही समावेश होता. मात्र फड गँगमधील पाच आरोपींवर मकोका रद्द केल्याने अनेक प्रश्न उपस्थित होत आहेत. गोट्या गित्ते हा वाल्मिक कराडचा राईट हँड असून तो अद्याप फरार आहे. त्याला अटक न करताच, चौकशी करण्याआधीच मकोकातून दिलासा मिळाल्याने सर्वांच्या भुवया उंचावल्या आहेत
