US Open 2026 : बेन शेल्टनने सरळ सेट्समध्ये ग्रीक स्टारला दिवसा दाखवले तारे! आता गतविजेत्या अल्काराजशी होणार महासंग्राम
US Open 2026 : यूएस ओपनच्या उपांत्यपूर्व फेरीत बेन शेल्टनसमोर गतविजेता कार्लोस अल्काराझचे आव्हान असणार आहे.
Ben Shelton Beats Stefanos Tsitsipas US Open 2026 Reaches Quarter Finals Carlos Alcaraz : अमेरिकेचा युवा स्टार टेनिसपटू बेन शेल्टन (Ben Shelton) याने आपल्या घरच्या मैदानावर यूएस ओपनमध्ये (US Open 2026) तुफानी कामगिरी करत अंतिम आठमध्ये प्रवेश केला आहे. आर्थर ॲश स्टेडियमवर रंगलेल्या पुरुष एकेरीच्या चौथ्या फेरीतील सामन्यात आठव्या मानांकित शेल्टनने ग्रीसच्या मातब्बर खेळाडू स्टेफानोस सितसिपासचा ६-२, ६-३, ६-४ असा सरळ सेट्समध्ये धुव्वा उडवला. अवघ्या १ तास ५१ मिनिटांत हा एकतर्फी विजय नोंदवून शेल्टनने ग्रँड स्लॅमच्या उपांत्यपूर्व फेरीत धडक मारली आहे.
सितसिपासला पुनरागमनाची संधीच नाही; १ तास ५१ मिनिटांत उडवला फडशा!
सामन्याच्या सुरुवातीपासूनच शेल्टनने अत्यंत आक्रमक पवित्रा घेतला. पहिल्या दोन फेऱ्यांमध्ये कठीण आव्हानांचा सामना केल्यानंतर सितसिपासविरुद्ध त्याने सर्वोत्तम फॉर्म सादर केला. दुसऱ्या सेटमध्ये २-५ ने पिछाडीवर असताना सितसिपासने मेडिकल टाईमआऊट घेत मदत मागितली, तरीही त्याला लयीत परतता आले नाही. तिसऱ्या सेटमध्ये १-१ च्या बरोबरीनंतर शेल्टनने सितसिपासची सर्व्हिस ब्रेक केली आणि ग्रीक खेळाडूने बॅकहँड शॉट नेटमध्ये मारताच शेल्टनने विजयावर शिक्कामोर्तब केले.
कारकिर्दीत सहाव्यांदा ग्रँड स्लॅमच्या अंतिम आठमध्ये; हार्ड कोर्टवर दबदबा –
BEN THERE. DONE THAT. QUARTERS NEXT. 🎾
Ben Shelton moves on to the US Open quarterfinals where he will face Carlos Alcaraz 👀 pic.twitter.com/HfY1bpiBmr
— ESPN (@espn) September 7, 2026
या दिमाखदार विजयासह बेन शेल्टनने आपल्या कारकिर्दीत सहाव्यांदा ग्रँड स्लॅम उपांत्यपूर्व फेरीत धडक मारली आहे. यूएस ओपनच्या अंतिम आठमध्ये पोहोचण्याची ही त्याची दुसरी वेळ ठरली; यापूर्वी २०२३ मध्ये त्याने थेट उपांत्य फेरी गाठली होती. विम्बल्डननंतर सुरू झालेल्या नॉर्थ अमेरिकन हार्ड-कोर्ट हंगामात त्याचा विजय-पराजयाचा रेकॉर्ड १२-२ असा नेत्रदीपक राहिला असून, मॉन्ट्रियलमध्ये त्याने दुसरे एटीपी मास्टर्स १००० विजेतेपदही पटकावले आहे.
आता गतविजेत्या अल्काराझविरुद्ध महामुकाबला; सर्वात मोठी कसोटी!
उपांत्यपूर्व फेरीत बेन शेल्टनचा सामना विद्यमान विजेता आणि स्पेनचा युवा सुपरस्टार कार्लोस अल्काराझशी होणार आहे. अल्काराझने चौथ्या फेरीत टॉमी पॉलला सरळ सेट्समध्ये पराभूत केले आहे. शेल्टन आणि अल्काराझ यांच्यात आतापर्यंत झालेल्या तिन्ही एटीपी सामन्यांमध्ये स्पॅनिश खेळाडूने बाजी मारली आहे. गेल्या वर्षी फ्रेंच ओपनमध्ये दोघांची शेवटची भेट झाली होती. त्यामुळे जबरदस्त फॉर्मात असलेल्या शेल्टनसाठी ही उपांत्यपूर्व लढत यूएस ओपनमधील सर्वात मोठी कसोटी ठरणार आहे.
