Baramati APMC – शेतकर्यांना योग्य दर मिळावा तसेच बाजारभावातील चढउतारांपासून संरक्षण मिळावे या उद्देशाने केंद्र शासनाच्या किमान आधारभूत किंमत योजनेअंतर्गत बारामती कृषी उत्पन्न बाजार समिती हरभरा (चना) हमीभाव खरेदी केंद्र सुरू करण्यात आले आहे. या खरेदीसाठी 1 मार्च 2026 पासून ऑनलाईन नोंदणी प्रक्रिया सुरू झाली असून ती 31 मार्च 2026 पर्यंत चालणार आहे. बारामती बाजार आवारातील लिलावात सर्वसाधारण दर्जाच्या हरभर्याला हमीभावापेक्षा कमी दर मिळत असल्याने शासनाकडे खरेदी केंद्र सुरू करण्याची मागणी करण्यात आली होती. त्या मागणीची दखल घेत मार्केटिंग फेडरेशन, पुणे यांच्या माध्यमातून हरभरा खरेदी केंद्रास मंजुरी देण्यात आली आहे. त्यामुळे तालुक्यातील हरभरा उत्पादक शेतकर्यांना हमीभावाने शेतमाल विक्रीची संधी उपलब्ध होणार आहे. सध्या बाजारात हरभर्याचे दर प्रति क्विंटल सरासरी 4,900 रुपये तर कमाल 5,100 रुपये इतके आहेत. केंद्र शासनाने हरभर्याचा हमीदर 5,875 रुपये प्रति क्विंटल निश्चित केला आहे. त्यामुळे ऑनलाईन नोंदणी केलेल्या शेतकर्यांकडून शासनाच्या निकषांनुसार हरभरा खरेदी करण्यात येणार आहे. शासनाच्या नियमानुसार वाळलेला व स्वच्छ दर्जाचा हरभरा प्रति एकर 2.50 क्विंटल प्रमाणे खरेदी करण्यात येईल. नोंदणीसाठी 7/12 उतारा, सन 2025-26 चा पिकपेरा हरभरा नोंद, आधार कार्ड, आएफएससी कोडसह बँक पासबुकची झेरॉक्स आणि मोबाईल क्रमांक सादर करणे आवश्यक आहे. नोंदणी झालेल्या शेतकर्यांना एसएमएसद्वारे संदेश प्राप्त झाल्यानंतर बारामती मुख्य यार्डातील यांत्रिक चाळणी खरेदी केंद्रावर हरभरा विक्रीस आणावा, अशी माहिती सचिव अरविंद जगताप यांनी दिली. दरम्यान, शेतकर्यांनी निरा कॅनॉल संघ, बारामती येथे मुदतीत ऑनलाईन नोंदणी करून खरेदी केंद्राचा लाभ घ्यावा, असे आवाहन समितीचे सभापती विनायक गावडे व उपसभापती अरुण सकट यांनी केले आहे. तसेच बाबालाल काकडे निरा कॅनॉल संघाचे चेअरमन सतीश काकडे यांनीही तालुक्यातील शेतकर्यांनी या योजनेचा लाभ घ्यावा असे सांगितले.
