Banana Price Drop – सध्या देशभरात विविध धार्मिक सण व उत्सवांचा काळ सुरू असल्याने केळीला चांगला भाव मिळेल, अशी आशा बाळगून असलेल्या केळी उत्पादक शेतकऱ्यांचा पूर्णपणे अपेक्षाभंग झाला आहे. गेल्या ८ ते १० दिवसांत केळीच्या दरात प्रचंड घसरण झाली असून, व्यापारी खरेदीसाठी बागेकडे फिरकेनासे झाले आहेत. त्यामुळे इंदापूर तालुक्यातील केळी उत्पादक शेतकरी मोठ्या आर्थिक संकटात सापडले आहेत.

केळी हे नाशवंत फळ असल्याने ते वेळेत बाजारात जाणे गरजेचे असते. हीच हतबलता ओळखून व्यापारी मुद्दाम खरेदीला विलंब लावत असल्याचा आरोप शेतकऱ्यांनी केला आहे. तोडणी रेंगाळल्याने कडक ऊन व वाऱ्यामुळे केळीच्या घडांची झाडावरच पडझड सुरू झाली आहे. त्यामुळे नुकसान टाळण्यासाठी अखेर व्यापाऱ्यांच्या पडेल भावात केळी विकण्याची वेळ शेतकऱ्यांवर आली आहे.

वादळामुळे मध्यंतरी केळीच्या बागांचे मोठे नुकसान झाले होते. परिणामी बाजारात आवक मर्यादित असतानाही केळीचे भाव पाडले जात आहेत. या प्रकरणी शासनाने तातडीने हस्तक्षेप करून केळी उत्पादकांना दिलासा द्यावा, अशी मागणी इंदापूर व अकलूज परिसरातील शेतकऱ्यांकडून केली जात आहे.

“व्यापारी जाणीवपूर्वक बागेकडे येण्याचे टाळत असून, केळी उत्पादक शेतकऱ्यांना आर्थिक कोडींत पकडण्याचा हा डाव आहे. माल पडून राहिल्यास शेतकरी घाबरून कमी दरात माल देईल, याच हेतूने व्यापाऱ्यांकडून ही आर्थिक लूट सुरू आहे.”
– स्थानिक केळी उत्पादक.

निर्यात मंदावली; १० दिवसांत दर घसरले
१० दिवसांपूर्वी निर्यातक्षम केळीला प्रति किलो १७ ते १८ रुपये असा चांगला भाव मिळत होता. मात्र, तो दर घसरून आता थेट ११ ते १२ रुपयांपर्यंत खाली आला आहे. मध्य पूर्व आशियातील तणाव आणि युद्धाच्या पार्श्वभूमीवर केळीची निर्यात मंदावल्याचे व्यापाऱ्यांकडून सांगण्यात येत आहे. दुसरीकडे, देशांतर्गत बाजारासाठी व्यापारी प्रति किलो अवघा ७ ते १० रुपये दर मागून शेतकऱ्यांची अडवणूक करत आहेत.