Ayush Mhatre Century broke Rohit Sharma World Record : सय्यद मुश्ताक अली ट्रॉफी २०२५ मध्ये मुंबईचा युवा फलंदाज आयुष म्हात्रेने विदर्भाविरुद्धच्या सामन्यात धमाकेदार फलंदाजीचा नमुना पेश केला. सलामीला आलेल्या आयुषने वादळी शतक झळकावून विरोधी संघाच्या गोलंदाजांना अक्षरशः जेरीस आणले आणि मुंबईला सहज विजय मिळवून दिला. विदर्भाने प्रथम फलंदाजी करताना १९२ धावा केल्या होत्या, पण आयुषच्या खेळीमुळे मुंबईने हे लक्ष्य सहज गाठले. यासह आयुष म्हात्रेने रोहित शर्माचा जागतिक विक्रम मोडला. रोहित शर्माचा जागतिक विक्रम मोडला – विदर्भाविरुद्धच्या सामन्यात आयुष म्हात्रेने ५३ चेंडूंमध्ये ८ चौकार आणि ८ षटकारांच्या मदतीने ११० धावा कुटल्या. या शतकी खेळीसह आयुष म्हात्रेने एक मोठा जागतिक विक्रम आपल्या नावावर केला आहे. तो फर्स्ट क्लास , लिस्ट-ए आणि टी-२० या तिन्ही फॉरमॅटमध्ये शतक झळकावणारा जगातील सर्वात कमी वयाचा खेळाडू ठरला आहे. आयुष म्हात्रेने जेव्हा हा तिहेरी विक्रम पूर्ण केला, तेव्हा त्याचे वय १८ वर्षे १३५ दिवस होते. यापूर्वी, हा जागतिक विक्रम भारताचा स्टार फलंदाज रोहित शर्माच्या नावावर होता. रोहितने जेव्हा तिन्ही फॉरमॅटमध्ये शतक पूर्ण केले होते, तेव्हा त्याचे वय १९ वर्षे ३३९ दिवस होते. विशेष म्हणजे, आजच बीसीसीआयने त्याची अंडर-१९ आशिया कपसाठी भारतीय संघाचा कर्णधार म्हणून नियुक्ती केली आहे. हेही वाचा – Ayush Mhatre Century : कर्णधारपद मिळताच आयुष म्हात्रेनं ठोकलं तुफानी शतक; मुंबईचा विदर्भावर दणदणीत विजय! तिन्ही फॉरमॅटमध्ये शतक ठोकणारे सर्वात युवा फलंदाज: फलंदाज वय आयुष म्हात्रे १८ वर्षे १३५ दिवस रोहित शर्मा १९ वर्षे ३३९ दिवस उन्मुक्त चंद २० वर्षे ० दिवस क्विंटन डी कॉक २० वर्षे ६२ दिवस अहमद शहजाद २० वर्षे ९७ दिवस आयुष म्हात्रेची प्रभावी कारकीर्द – आयुष म्हात्रेची क्रिकेट कारकीर्द आतापर्यंत प्रभावी ठरली आहे: फर्स्ट क्लास: १३ सामन्यांत २ शतके आणि २ अर्धशतकांसह ६६० धावा. लिस्ट-ए: ७ सामन्यांत २ शतके आणि १ अर्धशतकासह ४५८ धावा. टी-२०: एका शतकासह ३६८ धावा. हेही वाचा – क्रिकेट विश्वात मोठी खळबळ! RCB नंतर आता ‘हा’ संघही IPL 2026 पूर्वी विकला जाणार, जाणून घ्या कोणता आहे? आयुष म्हात्रे आयपीएलमध्ये चेन्नई सुपर किंग्ज (CSK) संघाकडून खेळतो. आयपीएल २०२५ मध्ये त्याने ७ सामन्यांत २४० धावा केल्या होत्या, ज्यात ९४ धावांची मोठी खेळी देखील समाविष्ट होती.
