Ashadhi Wari – श्री संत ज्ञानेश्वर महाराज आणि जगद्गुरू संत श्री तुकाराम महाराज आषाढी वारीची तयारी अंतिम टप्प्यात आली आहे. वारी मार्गावरील वाहनांची आरटीओकडून मोफत तपासणी करण्यात येणार आहे. मार्गावर विद्यूत सुरक्षेला प्राधान्य देण्याच्या सूचना दिल्या असून आषाढी यात्रेवेळी पंढरपूरमध्ये अत्यावश्यक रुग्णांसाठी एअर ॲम्बुलन्स सज्ज ठेवण्यात येणार आहे. यात्रेवेळी पंढरपूरमध्ये भाविकांची मोठी गर्दी होते. यावेळी वारकऱ्यांना आरोग्य सुविधा तात्काळ मिळाव्यात यासाठी सुसज्ज रुग्णवाहिका, बाईक ॲम्बुलन्सचा वापर होते.

यावर्षी अत्यावश्यक रुग्णांसाठी एअर ॲम्बुलन्सची सुविधा ठेवण्यात येणार असल्याची माहिती सार्वजनिक आरोग्य व कुटुंब कल्याण मंत्री प्रकाश आबिटकर यांनी दिली. आषाढी यात्रेच्या पार्श्वभूमीवर वारकऱ्यांना पालखी मार्ग, तळांवर देण्यात येणाऱ्या आरोग्य सुविधांच्या आढावा बैठकीत ते बोलत होते. यावेळी राष्ट्रीय आरोग्य अभियानाचे संचालक संजय काटकर, राज्‍यातील आरोग्य विभागाचे वरिष्ठ अधिकारी, जिल्हा शल्यचिकित्सक, जिल्हा आरोग्य अधिकारी, महापालिका आरोग्य अधिकारी,

वैद्यकीय अधीक्षक आणि तालुका आरोग्य अधिकारी दृकश्राव्य माध्यमाद्वारे उपस्थित होते. आबिटकर म्हणाले की, भाविक वारीसाठी घरातून बाहेर पडल्यानंतर पुन्हा घरी पोहोचेपर्यंत आरोग्याच्या सर्व आवश्यक सुविधा पुरवण्याचे नियोजन आरोग्य विभागाने केले आहे. वारी कालावधीत भाविकांना डिजिटल आरोग्य सुविधा देण्यात येणार आहेत. आरोग्य संपन्न वारी व वारी सहाय्य या माध्यमातून पालखी मार्गावर भाविकांना तात्काळ आरोग्य सुविधा मिळणार आहे. यासाठी प्रत्येक आरोग्य कर्मचारी व आशा सेविका यांच्यामार्फत माहिती दिली जाईल.

वाहनांची मोफत तपासणी
वारीत सहभागी होणाऱ्या सर्व वाहनांची पुणे आरटीओ तांत्रिक तपासणी करणार आहे. वारीतील सहभागी मालवाहू गाड्या, बस आणि सर्व लहान-मोठ्या वाहनधारकांनी तात्काळ तपासणी करून घ्यावी, असे आवाहन प्रादेशिक परिवहन अधिकारी अर्चना गायकवाड यांनी केले आहे. दोन्ही पालखी मार्गांवर भाविक, प्रवासी आणि जड वाहने मोठ्या प्रमाणावर असतात. वाहनांमध्ये अचानक तांत्रिक बिघाड होऊन अपघात घडू नयेत तसेच रस्त्यात वाहने बंद पडून वाहतुकीला अडथळा निर्माण होऊ नये,

यासाठी सर्व वाहनांची दोन ठिकाणी तपासणीची व्यवस्था केली आहे. आळंदी रोड चाचणी मैदान, पुणे आणि दिवे येथील टेस्ट ट्रॅक कार्यालय (सासवड रस्ता) या केंद्रांवर मोटार वाहन निरीक्षक वाहनांची इंजिन, ब्रेक, लाईट्स आणि इतर तांत्रिक बाबींची तपासणी करतील. ही तपासणी पूर्णपणे मोफत असून, तपासणीवेळी वाहनाचे नोंदणी प्रमाणपत्र (आरसी बुक), टॅक्स आणि विमा असलेले प्रमाणपत्र, फिटनेस प्रमाणपत्र, पीयुसी, चालक परवाना आदी महत्वाची कागदपत्रे आवश्यक आहे. तपासणीनंतर वाहनांना प्रमाणपत्रही दिले जाईल.