Appa Balwant Chowk – राज्य शिक्षण मंडळाच्या शाळा आजपासून उत्साहात सुरू होत आहेत. नव्या शैक्षणिक वर्षाच्या स्वागतासाठी विद्यार्थी आणि पालक सज्ज झाले असून, शाळा सुरू होण्याच्या पूर्वसंध्येला रविवारी अप्पा बळवंत चौकात शालेय साहित्‍य खरेदीसाठी पालकांची प्रचंड गर्दी पाहायला मिळाली. नव्या वह्या, पुस्तके, दप्तर, वॉटर बॉटल आणि रंगीबेरंगी कंपास बॉक्स खरेदीसाठी रविवारी सकाळपासूनच पालकांनी मुलांसह अप्पा बळवंत चौकात हजेरी लावली होती.

दुपारनंतर तर या गर्दीने उच्चांक गाठला. येथील पुस्तकांच्या दुकानांबाहेर ग्राहकांच्या लांबच लांब रांगा लागल्याचे चित्र होते. पालकांना सर्व साहित्य एकाच ठिकाणी आणि घाऊक दरात मिळत असल्याने दरवर्षीप्रमाणे यंदाही या चौकाला पालकांनी पहिली पसंती दिली. आजच्या डिजिटल आणि ऑनलाइन जगताच्या काळातही, नव्या कोऱ्या पुस्तकांचा सुवास आणि दुकानात जाऊन स्वतः साहित्य निवडण्याचा निखळ आनंद मुलांच्या चेहऱ्यावर स्पष्ट दिसत होता.

गुलाबपुष्पने स्वागत
नवीन शैक्षणिक वर्षाच्या पहिल्याच दिवशी शाळांमध्ये प्रवेश करणाऱ्या विद्यार्थ्यांचे स्वागत करण्यासाठी शहरातील प्राथमिक, माध्यमिक शाळा सज्ज झाल्या आहेत. दीर्घ सुट्टीनंतर शाळा सुरू होत असल्याने वर्गखोल्यांची स्वच्छता आणि रंगरंगोटीची कामे पूर्ण झाली आहेत. विद्यार्थ्यांचा उत्साह वाढवण्यासाठी काही शाळांच्या प्रवेशद्वारांवर आकर्षक कमानी, फुग्यांची सजावट आणि सुंदर रांगोळ्या काढण्यात आल्या आहेत. काही शाळांमध्ये पहिल्या दिवशी विद्यार्थ्यांचे औक्षण करून, तर कुठे गुलाबपुष्प आणि गोड खाऊ देऊन स्वागत करण्याचे नियोजन केले आहे.

ओझ्याशिवाय पहिला दिवस
शासकीय आणि अनुदानित शाळांमध्ये शिक्षण विभागातर्फे पहिल्याच दिवशी विद्यार्थ्यांना मोफत पाठ्यपुस्तकांचे वाटप करण्यात येणार आहे. विद्यार्थ्यांचा पहिला दिवस दप्तराच्या ओझ्याशिवाय आनंददायी जावा, यासाठी अनेक शाळांनी पहिल्या दिवशी केवळ स्वागत समारंभ आणि सांस्कृतिक कार्यक्रमांचे आयोजन केले आहे. नव्या दप्तराचे ओझे पाठीवर आणि चेहऱ्यावरचा आनंद घेऊन शाळेत पाऊल टाकणाऱ्या या चिमुरड्यांच्या स्वागतासाठी शिक्षक आणि शाळा प्रशासनामध्ये कमालीचा उत्साह आहे.