Vaibhav mangale । Amitabh Bachchan : गुजरातमधील गांधीनगर येथील पाचवीत शिकणारा ‘इशित भट्ट’ हा कौन बनेगा करोडपती (केबीसी १७) मधील त्याच्या वागण्यामुळे सोशल मीडियावर ट्रोलिंगचा सामना करत आहे. अभिनेते अमिताभ बच्चन यांनी आयोजित केलेल्या शोमध्ये त्याचा अतिआत्मविश्वास आणि वागणूक प्रेक्षकांना पसंत पडली नाही.

बिग बींशी त्याच्या वागण्यानेही प्रेक्षकांना राग आला आहे. दरम्यान, सोशल मीडियावर त्याच्या संगोपनाबद्दल प्रश्न उपस्थित केले जात आहेत. दरम्यान, अश्यातच एका मराठमोळ्या अभिनेत्याने यावर शेअर केलेली पोस्ट चर्चेत आली आहे.

अभिनेता वैभव मांगले यांनी सोशल मीडियावर केबीसीचा प्रोमो पाहून एक पोस्ट शेअर केली आहे. या पोस्टच्या माध्यमातून त्यांनी शंका उपस्थित केली असून भीषण वास्तवाचीही जाणून करुन दिली आहे. जर केबीसीच्या प्रसिद्धीसाठी त्या मुलाचा वापर केला गेला असेल तर… असा प्रश्न त्यांनी पोस्टच्या माध्यमातून व्यक्त केला आहे.

काय आहे अभिनेत्याची पोस्ट?

वैभव मांगले यांनी त्यांच्या अधिकृत फेसबुक अकाऊंटवर एक पोस्ट शेअर केली आहे. या पोस्टमध्ये त्यांनी “केबीसीच्या प्रसिद्धीसाठी त्या मुलाचा वापर केला गेला असेल तर आपण एका भीषण वास्तवात आहोत. हकनाक त्या मुलाच्या भविष्याचा बळी दिला गेला” असे म्हटले आहे. त्यांची ही पोस्ट सध्या सोशल मीडियावर तुफान व्हायरल झाली आहे.

मुलाला मानसिक आजार?

सोशल मीडियावर केबीसीचा व्हिडीओ व्हायरल झाल्यानंतर संगीतकार कौशल इमानदार यांनी एक पोस्ट शेअर त्याला ADHD म्हणजेच Attention Deficit Hyperactivity Disorder असावा अशी शक्यता व्यक्त केली. हा विकार साधारपणे बालवयापासून सुरू होतो. त्यानंतर अनेक वर्षे या आजाराची मानसिक विकाराची लक्षणे राहतात. या आजारामुळे मुले हायपर अॅक्टिव्ह असतात. तसेच त्यांच्या वागणुकीत संतुलन राहात नाही.