Ajit Pawar : पुण्यातील मुळशी तालुक्यातील वैष्णवी हगवणे या विवाहितेने आत्महत्या केल्याने राज्यात एकच खळबळ उडाली आहे. हुंड्यासाठी छळ झाल्याने वैष्णवीने जीवन संपवल्याचं सांगितलं जात आहे. तर वैष्णवीची हत्या करण्यात आल्याचा आरोप तिच्या कुटुंबीयांनी केला आहे.

विशेष म्हणजे अजित पवार गटाच्या नेत्याची वैष्णवी ही सून होती. त्यामुळे अजित पवारही या लग्नाला उपस्थित होते. त्यावरून अजित पवार यांच्यावर टीकेची झोड उठवली आहे. या सर्व प्रकरणावर उपमुख्यमंत्री अजित पवार यांनी भाष्य केलं आहे.

अजित पवार म्हणाले, या प्रकरणात आपली उगाच बदनामी केली जात आहे. कुणाच्या लग्नाला जाणं ही माझी चूक आहे का? उगाच बदनामी करताय. माझी चूक असेल तर फासावर लटकवा, अशा शब्दात अजित पवार यांनी आपला संताप व्यक्त केला आहे.

नेमकं काय म्हणाले अजित पवार ?

अजित पवार म्हणाले, तु्म्ही घरचे लोक आहात मी सांगतो, तुम्ही अनेक जण मला लग्नाला बोलावता. शक्य असेल तेवढं यायचा मी प्रयत्न करतो, त्या भागात असेन तर उशिरा का होईना मी लग्नाला हजेरी लावतो. आता एखाद्या लग्नाला मी गेलो, आणि त्यांनी नंतर त्यांच्या सुनेला काही वेडवाकडं केलं, त्रास दिला तर तिथे माझा काय संबंध? असा संतप्त सवाल करत अजित पवार म्हणाले त्यांना मी सांगितलं का असं कर म्हणून?

राष्ट्रवादीशी कोणताही संबंध नाही : सुनील तटकरे

मुळशीच्या हगवणे कुटुंबाचा राष्ट्रवादीशी सध्या कोणताही संबंध नाही. राजेंद्र हगवणे हे राष्ट्रवादी काँग्रेस पक्षाच्या कोणत्याही पदावर नियुक्त नव्हते, असे सुनील तटकरे म्हणाले आहेत.

तीन आरोपींना न्यायालयीन पोलिस कोठडी

दरम्यान, या प्रकरणात वैष्णवीचा सासरच्या लोकांनी छळ केला असल्याचा आरोप देखील होत आहे. या प्रकरणी पोलिसांनी तीन आरोपींना अटक केली असून वैष्णवीचा सासरा आणि दीर फरार आहेत. त्यांच्या शोधासाठी पोलिसांचे चार पथक तैनात करण्यात आली आहेत. पोलिसांनी अटक केलेल्या तीन आरोपींना न्यायालयाने पोलिस कोठडी सुनावली आहे.